نووسینەکەی کاک (شه‌ریف عەلی)م خوێندەوە (پڕۆفیسۆرێکی زانکۆی سلێمانی بابەتێکم دەبات‌و لەوێبسایتەکانی [دبلۆماتیک‌و ئاوێنە] بەناوی خۆیەوە بڵاوی دەکاتەوە)
ئەو برادەرە زۆر بە هەڵەدا چووە، چونکە یەکەم: من تەنیا لە (ئاوێنە) و (فەیسبووک)دا دەنووسم و لە وێبسایتی (دبلۆماتیک) بڵاوم نەکردووەتەوە، ئەوە خۆیان بڵاویانکردووەتەوە.
دووەم: گەر وتارەکەم لە چەن بەشێ پێکهاتبێ، ئەوا ناوی سەرچاوەکان، لە کۆتایی هەموو بەشەکانی بابەتەکەدا دەنووسم. بەڵام وا دیارە ئەو برادەرە، بە پەلە ئەو چەن دێڕەی نووسیوە و ئەو هەرایەی ناوەتەوە، بێ ئەوەی وتارەکەی من و کۆمێنتەکان بخوێنێتەوە!
زۆر لە ئەوە دەچێ، کاک (شەریف) وتارەکانی ئاوێنە نەخوێنێتەوە، هەرچەندە جارجار وتار بڵاودەکاتەوە. ئەگینا گەر وتارەکانی منی بخوێندایەتەوە، ئەوا لە کۆتایی وتاری بەشی چوارەم (وڵایەتی موسوڵ و سەرژمێریی) ڕۆژی (1. 8. 2023)دا، لە کۆتاییەکەیدا نووسیومە: (لە کۆتایی وتارەکاندا، ناوی سەرچاوەی هەموو بەشەکان نووسراوە.)
جگە لە ئەوەی، هەر لە هەمان ئەو وتارە و لە هەمان ڕۆژدا، کە کاک (شەریف) ئەو هەموو هەرایەی ناوەتەوە، هاوڕێیەک داوای سەرچاوەی ئەو بەڵگەنامەیەی لێ کردووم، منیش بۆم ڕوونکردووەتەوە و بە ئەم شێوەیە وەڵامم داوەتەوە:
ئیسماعیل حەمە
دەستخۆش دکتۆر. بێزەحمەت ناوی ئەو دیپلۆماتە ئینگلیزییە چییە، کە لە خاڵی یەکەم ئاماژەت پێکردووە؟
حوسێن عەزیز
ئەم بەڵگەنامەیە، لە ئەم سەرچاوەیەوە وەرگیراوە (شه‌ریف عەلی، نێچیرەڤان بارزانیی و بریتانیا، پوخته‌ی دیدی دبلۆماتكاره بریتانییه‌كان له به‌رایی سێ به‌ڵگه‌نامه‌دا، تا ساڵی 1982 ئاوایه به‌رانبه‌ر به كورد، ئاوێنە، 9. 6. 2021)
هەرچەندە ساڵانی بوو، ئەو کاتەی کاک (شه‌ریف)، لە (سولەیمانی) بوو، لە فەیسبووکدا هاوڕێم بوو، کۆمێنتمان بۆ یەکدی دەنووسی، بەڵام هیوادارم باش بزانێ، ئەز ئەو نووسەرە نیم، لەسەر ماندووبوونی نووسەرانی دیکە، وتارەکانم بڕازێنمەوە، چونکە ئەز تا ئیستە، جگە لە ئەوەی (50) نامیلکە و پەرتووکم چاپکردووە، بە سەدان وتاریشم، لە ڕۆژنامەکانی ناوەوە و دەرەوەی (کوردستان) نووسیوە، هەر لە (ئاوێنە)شدا و لە ماوەی ئەم (2) ساڵەی تێیدا دەنووسم، تا ئێستە (150) وتاری کورت و درێژم بڵاوکردووەتەوە.
لە کۆتاییشدا دەڵێم: بریا کاک (شەریف) هەر لە خۆیەوە، ئەم چەن دێڕەی نەنووسیایە: (کاتێک لە تەواوکردنی خوێندنی بەکالۆریۆس یەکەم بوم و بومە یاریدەدەری توێژەر لە زانکۆ، ئەوکات ڕۆژنامەی کوردستانی نوێ دەهێنرایە کتێبخانە. منیش جارجار بە ڕوکەش کە تەماشام دەکرد ... لە بابەتەکانی ناوی دا دەمدی ئەم پڕۆفیسۆر دکتۆر حوسێن محمد عەزیزە نوسەری ڕۆژنامەی [کوردستانی نوێ] ی یەکێتیی بو و خۆی بە هاوڕێی ئیبراهیم ئەحمەد دادەناو، ئێستاش لە ناو کورد دا بە نوسەرێکی دیار ناوی دەبەن.) چونکە ئەم قسە پڕوپووچانە، هیچ پێوەندییەکی بەسەر وەڵامەکەیەوە نییە!
جگە لە ئەوەی، نووسینەکەی تووڕەبوون و هەڵچوونێکی خۆڕایی زۆری پیوە دیارە، چەن جارێ بۆچوونەکانیشی خۆی دووبارەکردووەتەوە. باشتر وایە، کاک (شه‌ریف) پەلەنەکا، کەمێ لەسەرخۆ و وردبێ، توورە نەبێ و کەمێ نەرمونیان بێ، هەموو بابەتەکان بخوێنێتەوە، نەک بە قسەی هاوڕێیەکی، خۆی ماندووکا و ئەو هەموو وشانە ڕێزکا!