وردەکاری دەستگیرکردنی "حامید جەزائیری"؛ بە ٢١ کیسە کریستاڵەوە
  2026-11-18     

لە پێشهاتێکی ئەمنیدا لە پایتەختی عێراق، سەرچاوە ئەمنییەکان ڕایانگەیاند کە هێزە تایبەتەکان پیاوی ئایینی "حامید جەزائیری" و دوو کەسی دیکەیان بە تۆمەتی پەیوەندیدار بە ماددە هۆشبەرەکانەوە دەستگیرکردووە.

ئاوێنە: ​بەپێی زانیارییە سەرەتاییەکان، هێزێکی سەر بە بەڕێوەبەرایەتیی گشتیی کاروباری ماددە هۆشبەرەکان و کارتێکەرە عەقڵییەکان، ئۆپەراسیۆنێکیان لە ناو کۆمەڵگەی نیشتەجێبوونی "ڕەیحانە" لە دیوی ڕەسافەی شاری بەغدا ئەنجامداوە و تیایدا توانیویانە ئەو کەسانە دەستگیر بکەن.

​سەرچاوەکان ئاماژەیان بەوەش کردووە، ئەو دوو کەسەی لەگەڵ جەزائیریدا دەستگیرکراون، یەکێکیان کارمەندە لە دەستەی حەشدی شەعبی و ئەوی دیکەیان کەسێکی مەدەنییە. لە میانی ئۆپەراسیۆنەکەدا، هێزە ئەمنییەکان دەستیان بەسەر ٢١ کیسە لە ماددەی هۆشبەری جۆری "کریستاڵ"دا گرتووە.

​هەروەها باس لەوەش کراوە کە لەگەڵ تۆمەتبارەکاندا، دەست بەسەر ئۆتۆمبێلێکی حکومیدا گیراوە کە سەر بە حەشدی شەعبییە، لەگەڵ چەکێکی جۆری کڵاشینکۆف.

​تا ئامادەکردنی ئەم هەواڵە، لایەنە فەرمییەکانی عێراق هیچ ڕاگەیەندراوێکی فەرمییان سەبارەت بە وردەکاریی زیاتری دۆسیەکە و سروشتی ئەو تۆمەتانەی ئاراستەی دەستگیرکراوەکان کراون، بڵاونەکردووەتەوە.

زۆرترین بینراو
© 2026 Awene Online, Inc. All Rights Reserved.
×