بەگوێرەی میدیای نزیک لە حکومەتی هەرێم لە چەند کاتژمێری داهاتوو پڕۆسەی دابەشکردنی مووچەی مانگی نۆ دەستپێدەکات.
ئاوێنە: ئەمڕۆ دووشەممە، ١٤ی تشرینی یەکەمی ٢٠٢٤، میدیای نزیک لە حکومەتی هەرێمی کوردستان ئاشکرایدەکات، چەند کاتژمێرێکی تر لیستی مووچە ڕادەگەیەنرێت، ئەمەش لە کاتێکدایە کە دوێنێ هەمان میدیا ئاماژەی بەوەدا، بانکە بازرگانییەکانی هەرێمی کوردستان ڕاسپێردراون کە ئەگەر تاوەکو ٢٤ کاتژمێری داهاتوو پارە لە بەغداوە نەنێردرا دەست بەدابەشکردنی مووچەی مانگی نۆ بکرێت.
هەروەها دەشڵێت: پارەی پێویست بۆ مووچەی مانگی نۆ لەبەردەست نییە و حکومەتی هەرێمی کوردستان ٣١٤ ملیار دینار کورتهێنانی هەیە، چاوەڕوان دەکرێت ئەگەر تاوەکو ٢٤ کاتژمێری داهاتوو بڕی ئەو کورتهێنانە نەنێردرا ئەوا لە داهاتی ناوخۆ پڕدەکرێتەوە و دەست بە دابەشکردنی مووچە دەکرێت.
هەر بەپێێ زانیارییەکان، لە چەند کاتژمێری داهاتوو پڕۆسەی دابەشکردنی مووچەی مانگی نۆ دەستپێدەکات و تاوەکو ڕۆژی شەممەی داهاتوو سەرجەم فەرمانبەرانی هەرێمی کوردستان مووچە وەردەگرن.