موراد قەرەیلان، ئەندامی کۆمیتەی بەڕێوەبەریی پەکەکە له‌باره‌ی ده‌ستپێكردنه‌وه‌ی پڕۆسه‌ی ئاشتی له توركیا، رایگه‌یاند، "شتێکی وەها بونی نییەو نابێت کەس خەون و خەیاڵێکی وابکات، ئێستاش ڕۆژانە کورد دەکوژن و لە هەرێمەکە جێگیر دەبن، شەڕ هەیە، گۆشەگیریی بەردەوامە".
ئاوێنە: موراد قەرەیلان له‌میانی چاوپێكه‌وتنێیكدا له‌گه‌ڵ "رادیۆی دەنگی گەل" له‌باره‌ی هه‌واڵه‌كانی په‌یوه‌ست به‌دانوستانی كوردو حكومه‌تی ئه‌نقه‌ره، وتی "هەندێک کەس دەڵێن: ئایا پرۆسەیەکی نوێ دەست پێدەکات؟ شتێکی وەها بونی نییە نابێت کەس خەون و خەیاڵێکی وابکات، ئێستاش ڕۆژانە کورد دەکوژن و لە هەرێمەکە جێگیر دەبن، شەڕ هەیە، گۆشەگیریی لەسەر ڕێبەر ئاپۆ بەردەوامە، کەواتا، شتێکی لەوشێوە کە دەڵێن بونی نییە، بەڵام تەیب ئەردۆگان بەنیازە ئۆپۆزسیۆن به‌پێی خۆی دابڕێژێت، تەنانەت دەیەوێت دەست بۆ هەموان درێژ بکاتەوە و یاریان پێبکات".
وتیشی "ناوی قوفڵیان لەو هێرشانە ناوە کە دەیکەن؛ دەڵێن ئەو هەرێمە تەوق دەدەن و مانگی (تشرینی دوەم/11) قوفڵەکە دادەخەن، ئەوەتا مانگی تشرینی دوەمیش هات؛ هێندەی نەماوە، بەپێچەوانەوە لە زاپ ئەوان قوفڵ بون، ئێستا بیر لەوەدەکەنەوە کە ئەو قوفڵە چۆن بکەنەوە".
موراد قەرەیلان وتیشی "چوار ساڵە دەوڵەتی تورکیا نازانێت چۆن چەمی زێ کۆنتڕۆڵ بکات، هەر ئەوە بۆخۆی شکستی ئەوانە، لە کەناری چەمی زێ کاتێک گەریلاکانی ئازادی کوردستان لە شاخی جودی ئاگریان لە بارەگاکانیان بەردا، هاوڕێەکی یەژاستار وتبوی 'ئاگر کەوتە ناو دڵی ئەنقەرەوە، بەراستیش ئاگر کەوتوەتە ناو دڵی ئەنقەرە".
له‌باره‌ی هێرشی ئیسرائیل بۆ كه‌رتی غه‌ززه و فراوانبونی شه‌ڕ له رۆژهه‌ڵاتی ناوه‌ڕاست، موراد قه‌ره‌یلان وتی، "دەتوانین بڵێین ئەم شەڕە بەشێکە لە شەڕی نێوان عەرەبەکان و دەوڵەتی ئیسرائیل، چونکه ئامانجی سەرەکی ئێرانه شەڕێک بەدرێژایی ساڵێکە لە ناوچەکەدا بەردەوامە، لە ڕاستیدا، ئەم جەنگە دڵی مرۆڤ دەسوتێنێت، ئەم شەڕه لەدەرەوەی یاساکانی شەڕ بەڕێوەدەچێت، پێش هەمو شتێک دەڵێم؛ ئێمە دژی ئەم شەڕەین، ئەم شەڕە بەم شێوەیە هیچ چارەسەرێک ناهێنێتە ئاراوە و تەنها دوژمنایەتی نێوان لایەنەکان قوڵتر دەکاتەوە، سەرەتا گەلانی فەڵەستین، لوبنان و ئیسرائیل لەم شەڕەدا زیانیان پێدەگات و گەلانی هەرێمەکەش زیان دەبینن و ئازار دەچێژن".
ئه‌وه‌شی وت، "هێرشی حەماس کە بەناوی توفانی ئەقساوە ئەنجامیدا هەڵە بو، هەروەها ڕێبازەکانی هێرشی ئیسرائیل بۆ سەر غەززە و لوبنان هەڵەیە و ڕاست نییە، لەو شەڕانەدا کە بەم شێوەیە بەڕێوە دەچن هاوڵاتیانی مەدەنی و منداڵ و ژن دەبنە قوربانی و ئەمەش زۆر ئازاربەخشە وەک گوتم بەمشێوەیە هیچ چارەسەرێک نییە."
له‌باره‌ی لێدوانی ڕاوێژکاری ئەردۆگان كاتێك وتی، "دوای لوبنان، ئیسرائیل چاوی لەسەر تورکیایە"، قه‌ره‌یلان ده‌ڵێت، "ئاکەپە و مەهەپە سیاسەتێکی ساختە پەیڕەو دەکەن، ئامانجیان وەستاندنی خوێنڕشتن و ڕاگرتنی شەڕ نییە، بەڵکو پەرەپێدانی زیاتری شەڕەکەیە، بۆیە بەردەوام لایەنەکان هان دەدەن، ئەوان دەیانەوێت لە نێوان ئیسرائیل و ئێراندا شەڕ ڕوبدات و دەیانەوێت سودی لێوەربگرن، سیاسەتەکانی ئێستای تەیب ئەردۆغان بەم شێوەیەیە، واتا خۆی وەک لایەنگری فەڵەستین و عەرەب نیشان دەدات بەڵام ڕاست نییە، بەڵکو نیازی هاندانی جیهانی عەرەبییە".
موراد قەرەیلان رونیشیكرده‌وه، "ئەمریکا و ناتۆ سەرکردایەتی پڕۆسەیەک دەکەن لە ناوچەکەدا، تورکیاش دەڵێت بۆچی لە ڕێگەی منەوە ئەنجام نادرێت بۆچی کێشەکانی ناوچەکە لەلایەن ئیسرائیل و عەرەبەکانەوە هەڵدەسەنگێنرێن؟ منیش ئەندامی ناتۆم، بۆیە ناڕەزایی لە نەته‌نیاهۆ و زمانە توندەکەی دژی نەته‌نیاهۆ لەبەر ئەوەیە واتە دەترسن لە پڕۆژەکانی هەرێمەکە بخرێنە دەرەوە، ترسی دوەمیان لە کوردانە دەڵێن: ئەمە لە دەرەوەی ئێمەدا پەرەی پێدراوە، ئایا لە دیزاینی نوێدا کورد جێگای هەیە؟ ئەگەر هەبێت ئەوە مەترسیە، واتا کورد بە مەترسی دەبینێت ئەوە ترسی سەرەکی ئەوانە، بۆیە لە شڵەژاوی و ترسدان".
رونیشیكرده‌وه، "ئه‌ردۆگان هەمیشە دەیەوێت ڕۆژەڤی نوێ دروست بکات، ئێستا دەیەوێت سود لەو هەلومەرجانە وەربگرێت و سوریا و ئێران لە هاوپەیمانێتی دژ بە کورد لەگەڵ عێراق بە هاوکایی پارتی بەشدار بکات بۆیە دەیەوێت لە باشوری کوردستان خۆی بپارێزێت و بەشێکی ڕۆژئاوای داگیر کردوە و دەڵێت من بەردەوام دەبم لە داگیرکاریی، دەوڵەتی تورک دەڵێت، کوردستان گەشە بکات دەبێتە کۆسپ بۆ ئێمە و لاوازمان دەکات و ئەمەش لەسەر بنەمای ترسێکی وەها وا دەڵێت، ئێستا پەرلەمان دانیشتنێکی داخراو بەڕێوە دەبات، بەڵام پێموانییە ئەمە لە پارلماندا قسەی لەسەر بکرێت، وەک دەوڵەت ئەم بابەتانە لە ئاستێکی تەسکدا تاوتوێ دەکەن. ئەمە ترسی سەرەکی ئەوانە، واتا لەم کاتە نوێیەدا دیارە کە دەیانەوێت سیاسەت لەسەر دوژمنایەتی کورد بەڕیوە ببەن".
له‌باره‌ی دۆخی ئابوری توركیاوه، قه‌ره‌یلان ده‌ڵێت، "ئەمڕۆ له تورکیا برسێتی، بێکاری و هەژاری پەرەی سەندوە و ئەو کەسانەی پێشتر موچەیان وەردەگرت و فەرمانبەر بون، پێیان دەگوترا دەوڵەمەند ئێستا ئەوە ئیتر نەماوە، ئێستا ئەوانەی کارمەندی دەوڵەتن ناچارن کاری دوەم بدۆزنەوە، کرێکارەکان هەمویان برسێتی دەکێشن، گەل گەیشتونەتە سنوری برسێتی ئەمە ڕۆژەڤی سەرەکییە".
په‌یوه‌ست به هۆكاره‌كانی دروستبونی ئه‌و دۆخه له توركیا، وتی، "ماوەی 10 ساڵە هەمو داهاتی تورکیا بۆ شەڕ خەرج دەکرێت و هیچ ئەنجامێکی بەدەست نەهێناوە، محەمەد شمشەک وەک ڕزگارکەرێک هێنرایە سەر ئابوری و کرایە وەزیری خەزێنە، ئەم کەسە ڕاستیەکان باس ناکات، ئەم کەسە لە بنەڕەتدا کوردێکی خەڵکی کەرجەوسە، بەڵام لە سروشتی خۆی دابڕاوە ئاشکرایە کە ئەوان لە منداڵیدا لە هەندێك قوتابخانەدا پەروەردەیان بینیوەو و بەم شێوەیە لە سروشت و ڕاستی خۆیان دابڕاون، کەسێک لە ڕاستینەی خۆی دابڕاوە، ناتوانێت هیچ بڵێت، ئه‌و كه‌سه لە ڕاستی خۆی دورکەوتوتەوە ئەگەرنا بە گوێرەی ڕاستیەکان هەڵسوکەوتی دەکرد و دەیگوت: ئەگەر شەڕ بەردەوام بێت ئابوری وڵاته‌كه ده‌ڕمێت".