رازاندنەوەی عینكاوە، تەنها بۆ پاپا نەبێت

سەرتیپ جەوهەر

2021-03-10 1004

بۆ پێشوازی پاپا-ی ڤاتیكان حكومەتی هەرێم رێگاكانی بەرەو عەنكاوەو ناو شارۆچكەی عەنكاوەی نۆژەن و رازاندۆتەوە، دەیەوێ دیمەنێكی جوانی شارۆچكەیەی كە زۆرینەی دانیشتوانەكەی مەسیحین پێشانبدات. سەرنجی میوانەكان رابكێشێت كە مەسیحییەكانی كوردستان هەم شارەكەیان جیاوازەو هەمیش زۆر جیاوازتر لەناوچەكانی دیكەی عیراق دەژین.
عەنكاوە بۆخۆی شارێكی جوانە، كارێكی باشە زیاتر رازاندنەوەی، بەڵام ئەگەر بپرسین بزانین مەسیحییەكانی كوردستان وەك ئەو دیمەنەی پێشاندەدرێت، دەژین؟ یان هەستی شەراكەت یان لانیكەم بەشداربونیان لەحكومڕانیی كوردستان هەیە وەك كۆتا یان كەمینەی ئاینیی؟
رەنگە دەرفەتی ئەوەمان نەبێت تێروتەسەل لە وتارێكی كورتدا باسی ژیانی مەسیحییەكانی كوردستان بكەین، بەڵام دەكرێت بەروونی ئەو راستییە بڵێین كە تائێستا هیچ كام لەپێكهاتە نەتەوەیی و دینیەكانی كوردستان نەبوونەتە شەریكی راستەقینەی بەڕێوەبردن و ژیانی سیاسی. پێكهاتەی كلدۆ ئاشور سریان-ەكان و ئەرمەن (كە هەموویان مەسیحین) شەش ئەندامی كۆتایان لە پەرلەمان هەیە، بەڵام جگە لەئەندامێكیان، ئەوانی دیكە هیچیان نوێنەرایەتی ئەو پێكهاتانە ناكەن، بەڵكو بەدەنگی كورد دەبنە ئەندامی پەرلەمان! ئەو ئەندام پەرلەمانانە، لەباتی نوێنەرایەتی پێكهاتەكانیان و خەمی شەقامیان لەئەستۆ بێت، ئێستا بوونەتە بەشێك لەئەجێندای سیاسی ناوخۆی هەرێم و لەدوایین خولی پەرلەمانیشدا بەروونی بوونەتە گرفتێكی گەورە بۆ هەرێمی كوردستان، كراونەتە داردەست بۆ ئاڵۆزتركردنی دۆخی سیاسی! لەدەنگدانەكانی پەرلەمان وەك ئەندامی حزبی كوردی حیساب دەكرێن نەك وەك نوێنەری پێكهاتەی (كلدۆ ئاشور سریان و ئەرمەن) سەرەنجام زیان بەناوبانگی پێكهاتەكانیان و سیستمی كۆتا دەگەینن كە بۆ بەشداریكردنی ئەو گروپانە جێبەجێدەكرێت كە ناتوانن بگەنە پەرلەمان.
لەهەموو كابینەیەك وەزیرێك یان چەند بەڕێوبەرێكی گشتیی لەسەر پشكی مەسیحییەكان دادەنرێن، بەڵام هەر هەمویان ئەندامی حزبی كوردین و نوێنەرایەتی مەسیحییەكان ناكەن و هیچ پەیوەندیان بەخەم و خواستی مەسیحییەكانی كوردستانەوە نییە! لەوەش زیاتر، تەنانەت لەشارۆچكەی عەنكاوە، جگە لەبەڕێوبەرێك كە كەمترە لەپەنجەكانی دەست، ئەوانی دیكە بەڕێوبەرو جومگە سەرەكیەكانی ئیدارەی شارەكە بەدەست كورد یان موسڵمانەوەیەو مەسیحییەكان پەراوێزخراون! واتە لەو شارۆچكەیەی كە زۆرینەی رەهان، مەسیحیەكان كاربەدەست نین.
لەوانەی سەرەوە واوەتر، مەسیحییەكانی كوردستان تێبینیان لەسەر سرودی نیشتیمانی و ئاڵای كوردستان هەیە. پێیانوایە دەنگ و رەنگی ئەوان نییەو گوزارشت لەنەتەوەی كورد دەكات نەك هەموو گەلی كوردستان، بۆیە دەبێت لەبری سرودی (ئەی رەقیب) سرودێكی نوێ‌ دابنرێت كە سەردەمیانەو گوزارشت لەهەموو نەتەوەو ئاین و پێكهاتەكان بكات. هەروەك تێبینیان لەسەر ئاڵای كوردستان هەیەو پێیانوایە هیچ پەیوەندی بەمێژوو ژیانی ئەو پێكهاتانەوە نییە، دەیانەوێ‌ ئەگەر ئاڵاكەش نەگۆڕدرێت كە دەستكاریكردنی زەحمەتە، لانیكەم قانونی ئاڵای كوردستان هەمواربكرێتەوەو لێكدانەوەو شیكردنەوەی رەنگەكان بگۆڕردرێت بەجۆرێك ئەوانیش خۆیان تێدا ببیننەوە.
بەكورتی، رازاندنەوەی عەنكاوە تەنها بەخاتری هاتنی پاپا نەبێت، بەڵكو هەستی شەریكبوون لەم نیشتیمانە قوڵبكرێتەوەو بەپێكهاتە ئیتنی و سیاسیەكانەوە، ئەوكاتە نەك بەتەنها شەقامەكانی عەنكاوە، بەڵكو هەموو كوردستان رەنگورووی جوانتر دەبێت، بەجۆرێك هەمووان هەستبكەن ئەم وڵاتە هی ئەوانە، نەك بوونی پێكهاتەكان لەناو پەرلەمان و حكومەت بۆ مەبەستی سیاسی و قوڵكردنەوەی ناكۆكییەكان بەكاربهێنرێت و سەرەنجام هەم پێكهاتەكان زیانیان پێبگات و هەمیش دۆخی سیاسی ئاڵۆزترو خراپتر ببێت.