ساڵح موسلیم سیاسەتمەداری دیاری کورد، جەخت لەسەر گرنگی چارەسەرکردنی پرسی کورد بۆ ڕۆژهەڵاتی ناوەڕاستێکی دیموکراسیی و سەقامگیر دەکاتەوە، هاوكات ئاماده‌یی ئیداره‌ی خۆسه‌ر بۆ گفتوگۆ له‌گه‌ڵ ئه‌نقه‌ره ده‌رده‌بڕێت و دەشڵێت: لە ڕێگەی نێوەندگرانەوە پەیوەندی لەگەڵ دەسەڵاتی نوێی سووریا دەکەین.
ئاوێنه: ساڵح موسلیم، ئه‌ندامی ده‌سته‌ی سه‌رۆكایه‌تی پارتی یەکێتیی دیموکرات (په‌یه‌ده) ڕایگه‌یاند، “هەمومان شاهیدی پێشهاتە بەردەوامەکانی ڕۆژهەڵاتی ناوەڕاستین، کە توندڕەوی بنبڕ دەکرێت و ڕژێمە کۆنەکان هەڵدەوەشێنرێنەوە بۆ دامەزراندنی سیستەمی نوێ هاوتەریب لەگەڵ ستانداردە مۆدێرنەکان، لەمبارەیەوە هەڵوێستی پارتەکەی دەخاتەڕوو.
ساڵح موسلیم دەڵێت: دۆخی سووریا وەک شۆڕشێکی جەماوەریی دەستی پێ کرد کە هاوڵاتییان داوای ئازادیی و دیموکراسییان دەکرد، بەڵام دەستێوەردانەکانی دەرەکی وای کردووە بۆ شەڕی ناوخۆ بگوازرێته‌وه، لە ئەنجامدا سەدان هەزار كه‌س کوژران و ئاوارەبوونی ملیۆنان کەسی لێكه‌وته‌وه.
ساڵح موسلیم باسی له‌وه‌شكرد، “داڕمانی ڕژێمی ئه‌سه‌د ڕووداوێکی مێژویی بەرچاوە کە خۆشی بۆ هەموو سوورییەکان هێناوە و لە زیاتر لە ٦٠ ساڵ لە ستەمکاری ڕزگاریان بووه، لەگەڵ ئەوەشدا پرسیارە ڕەخنەگرانەکە هەر ماوەتەوە، ئایا دەتوانین ئەو سووریایە بەدەستبهێنین کە شۆڕشی بۆ کرا؟
ئه‌وه‌شی خسته‌ڕوو، “لەگەڵ پێشڕەویکردنی هه‌یئه‌ی تەحریر شام بەرەو دیمەشق، گرووپە چەتەکانی تورکیا ناوچە کوردنشینەکانی كرده ئامانج و دڕندەیی ئەنجامدا کە بەراورد دەکرێت بە داعش، وەک سەربڕین و کوشتن لەسەر بنەمای ناسنامە و نه‌ته‌وه، له هه‌مانكاتدا دانیشتوانی عەفرین کە ئاوارەبوون لە کاتی داگیرکردنی شارەکەیان لە ساڵی ٢٠١٨ تائێستا به به‌رده‌وامی هێرشیان ده‌كرێته‌سه‌ر، هه‌روه‌ها کۆبانێ کە بووەتە هێمایەکی جیهانیی بەرخۆدان لە دژی داعش، بەڵام هێشتا ڕووبەڕووی دەستدرێژی دەبێتەوە”.
ساڵح موسلیم ده‌ڵێت، “ئێمە لە ئیدارەی خۆبەڕێوەبەریی دیموکراتی هەوڵ دەدەین لە ڕێگەی نێوەندگرانەوە پەیوەندی لەگەڵ فەرمانڕەوا نوێیەکانی دیمەشق بکەین، چونکە پێمان وایە پێکەوەژیان مومکینە ئەگەر ڕێز لە تایبەتمەندی فرەچەشنی پێکهاتەکانی سووریا بگرن، هەروەها ئێمە لە ڕێگەی نێوەندگرانەوە پەیوەندی لەگەڵ دەسەڵاتی نوێی سووریا دەکەین.
ڕوونیشیكرده‌وه، “ئامادەیی خۆمان دەربڕیوە بۆ بەشداریکردن لە گفتوگۆ لەگەڵ تورکیا بۆ پەرەپێدانی پەیوەندییە ئاشتیخوازەکانی دراوسێیەتی، بەڵام ترسی تورکیا سەبارەت بە هەر هه‌ڕه‌شه‌یه‌كی کوردی بەربەستێکە لەبەردەم ئاشتی و پەیوەندییە دۆستانەکاندا، ئێمە پێمان وایە ئەگەر تورکیا پرسی کورد لە ناوخۆدا چارەسەر بکات، کاریگەری ئەرێنی لەسەر پەیوەندییەکانی داهاتوو دەبێت”.