مەسعود پزیشکیان، سەرۆک کۆماری ئێران کۆتایی بە سەردانەکەی بۆ هەرێمی کوردستان و عێراق هێنا و بەرەو تاران گەڕایەوە.
ئاوێنه: ئاژانسى هەواڵى فەرمیى ئێران بڵاویکردەوە، مەسعود پزیشکیان، سەرۆک کۆماری ئێران لە بەسرەوە بەرەو تاران بەڕێکەوت و کۆتایی بە سەردانەکەی هەرێمی کوردستان و عێراق هێنا، کە ماوەی سێ رۆژی خایاند.
سەردانی سەرۆک کۆماری ئێران لە رۆژی 21ـی ئەیلوولی 2024 دەستیپێکرد و شاندێکی باڵا کە پێکهاتبوون لە بەرپرسانی سیاسی و ئابووریی ئێران یاوەرییان دەکرد، لە کاتی گەیشتنی بۆ فڕۆکەخانەی بەغداد، لەلایەن محەمەد شیاع سودانی، سەرۆکوەزیرانی عێراق پێشوازی لێکرا.
پزیشکیان لە بەغداد بەشێوەی جیا، لەگەڵ لەتیف رەشید، سەرۆککۆمار و محەمەد شیاع سودانی، سەرۆکوەزیرانی عێراق و فائیق زێدان سەرۆکی ئەنجوومەنی باڵای دادوەریی عێراق و سەرکردەکانی چوارچێوەی هەماهەنگی کۆبووەوە.
لە رۆژی دووەمی سەردانەکەی، پزیشکیان سەردانی هەولێر و سلێمانی کرد و کۆبوونەوەی لەگەڵ بەرپرسانی حکومی و سیاسیی هەرێمی کوردستان ئەنجامدا، لە ناویاندا بافڵ جەلال تاڵەبانی، سەرۆکی یەکێتیی نیشتمانیی کوردستان، مەسعود بارزانی سەرۆکی پارتی دیموکراتی کوردستان، مەسرور بارزانی سەرۆکوەزیران و قوباد تاڵەبانی جێگری سەرۆکوەزیرانی هەرێمی کوردستان.
کۆتا چالاکیی سەردانەکەی پزیشکیان سەردانکردنی مەزارگەکانی نەجەف و کەربەلابوون لە باشووری عێراق.