مشتومڕەکان لەباره‌ی کاندیدی دۆناڵد ترەمپ، سەرۆکی هەڵبژێردراوی ئەمریکا بۆ پۆستی داواکاری گشتی بەردەوامە و به‌ڵگه‌نامه‌یه‌ك ئاشكرای ده‌كات، "پارەی داوە بە ژنان لە بەرامبەر پەیوەندییەکدا".
ئاوێنه: بەڵگەنامەیەک دەریخستوە، کە لێکۆڵەرە فیدڕاڵیەکان زنجیرەیەک پارەیان ئاشکرا کردوە کە مات گەیتس و دەیان هاوڕێ و هاوکاری کە لەگەڵیدا بەشدارییان لە ئاهەنگەکانی سێکسیدا کردوە.
لەنێو ئەوانەی پارەیان لە مات گەیتس وەرگرتوە دو ژن هەبون کە شایه‌تی ئەوەیان داوە کە ئەو ئەوانی بۆ سێکس بەکرێ گرتوە، بەپێی ئەوەی ئەو بەڵگەنامەیە و پارێزەرانی ژنەکان باسیان کردوە.
ئەو پارێزەرە ئاماژەی بەوەکردوە، ئەو بڕە پارەیەی کە دراوە بەو ژنانە نزیکەی 10 هەزار دۆلار بوە، بەپێی ئەوەی ڕۆژنامەی نیویۆرک تایمز بڵاویکردوەتەوە.
جگە لەوەش، بەڵگەنامەکە دەریخستوە کە چۆن گەیتس و یەکێک لە هاوڕێکانی هەزاران دۆلاریان ناردوە بۆ دەیان کەس، کە بەپێی ئەو ئیفادانەی کە دەوترێت پێشکەش بە لێکۆڵەرانی فیدڕاڵی و کۆنگرێس کراوە، لە ساڵی 2017 تا 2020 بەشداری ئاهەنگی سێکسییان کردوە.
هەروەها بەڵگەنامەکە دەریخستوە کە لەنێو ئەو کەسانەی پارەیان لە هاوڕێکەی گایتز وەرگرتوە، ژنێک هەبوە کە بەپێی ئەو کەسانەی ئاگادارن لە وردەکارییەکانی دۆسیەکە، تەمەنی تەنها 17 ساڵ بوە کاتێک بەشداری یەکێک لەو ئاهەنگانە کردوە، هەروەها وێنەی گەیتس تۆماركراوه لەگەڵ دەیان ژن و چەند پیاوێک.
دوێنێ جێگری سەرۆکی هەڵبژێردراوی ئەمریکا جەی دی ڤانس یاوەری گایتزی کرد بۆ کاپیتوڵ هیڵ لە هەوڵێکدا بۆ کۆکردنەوەی پشتیوانی لە سیناتۆرەکانی کۆمارییەکان بۆ کاندیدکردنی، بەڵام زۆرێکیان گومانیان لە ئەگەری پشتڕاستکردنەوەی کاندیدبونی ناوبراو دەربڕی.
گەیتس-ی تەمەن 42 ساڵان لە ساڵی 2017 کاتێک نوێنەری ویلایەتی فلۆریدا بو لەبەردەم کۆنگرێسدا ئامادەبو، لە هەمان حاڵەتدا بە توندی ڕەتیکردەوە هیچ کارێکی هەڵەی کردبێت، وەزارەتی داد لەوکاتەدا لێکۆڵینەوەی فیدڕاڵی داخست بەبێ ئەوەی هیچ تۆمەتێک لەسەری بخاتە پاڵ.