وتەبێژی كۆمسیۆنی باڵای سەربەخۆی هەڵبژاردنەكانی عێراق رایگەیاند، پابەندن بە ئەنجامدانی هەڵبژاردنی پەرلەمانی عێراق لەو وادەی دیاریكراوی خۆیدا.
ئاوێنە: جومانە غەلای، وتەبێژی كۆمسیۆن، ئەمڕۆ هەینی، لە لێدوانێكدا بۆ ئاژانسی هەواڵی رەسمی عێراق، وتی، كۆمسیۆن لەڕوی دەستوری و یاساییەوە پابەندە بە ئەنجامدانی هەڵبژاردن لە وادەی دیاریكراوی خۆیدا.
وتیشی، ژمارەی دەنگدەرانی نوێ كە لەدایكبوی ساڵی 2007ن، زیاتر لە یەك ملیۆن دەنگدەرن و پڕۆسەی نوێكردنەوەی تۆماری دەنگدەران، تۆماركردنی دەنگدەرانی نوێ، راستكردنەوەی زانیارییەكان، سڕینەوەی ناوی كۆچكردوان و هروەها تۆماركردنی هێزە چەكدارەكان و دەزگا ئەمنییەكان و ئاوارەكان لەخۆدەگرێت.
ئاماژەی بەوەشدا، كۆمسیۆن لەڕێگەی هەزارو 79 ناوەندی تۆماركردنەوە لە سەرتاسەری عێراق پێشوازی لە دەنگدەران دەكات، ئەوەش وێڕای تیمە گەڕۆكەكان كە دەچنە دامەزراوە و فەرمانگەكانی دەوڵەت بە ئامانجی هۆشیاركردنەوە لەبارەی گرنگی نوێكردنەوەی تۆمارەكانی دەنگدان.
ئەوەشی خستەڕو، كۆمسیۆن لە ئێستادا كاردەكات لەسەر نوێكردنەوەو ئامادەكردنی ئامێرەكانی هەڵبژاردن لەپێناو گەرەنتیكردنی بەڕێوەچونی هەڵبژاردن بەشێوەیەكی كارا. جەختیشی كردەوە لەسەر گەرەنتیكردنی مافی ئەو دەنگدەرانەی كە پەنجەمۆریان نەخوێندراوەتەوە، ئەوەش لەڕێگەی بەكارهێنانی وەرگرتنی وێنەی چاو و روخسار.
هەروەها هێمای بۆ ئەوەش كرد، پێویست ناكات هەمو دەنگدەرێك سەردانی ناوەندەكانی تۆماركردن بكات ئەگەر كارتی دەنگدانەكەی وێنەی كەسی پێوە بێت و هیچ گۆڕانكارییەك لە زانیارییەكانیدا روی نەدابێت. ئەوەشی وتوە، پڕۆسەی نوێكردنەوەی تۆماری دەنگدان، گواستنەوە لەنێوان پارێزگاكان و هەروەها ئاگاداركردنەوە لە حاڵەتەكانی مردن لەخۆدەگرێت.
جومانە غەلای جەختیشی كردەوە كە كۆمسیۆن سورە لەسەر ئەنجامدانی هەڵبژاردنی پەرلەمانی عێراق لەو وادەیەدا كە لەلایەن سەرۆك وەزیرانەوە دیاری دەكرێت.