سەرۆک وەزیرانی عێراق رایدەگەیەنێت، بەرژەوەندیی عێراق و عێراقییەكان لە پێشینەی كارەكانی حكومەتە و دەشڵێت، بە مامەڵەی ژیرانە، عێراقیان لە شەڕ دوورخستەوە.
ئاوێنە: نوسینگەی راگەیاندنی سەرۆك وەزیرانی عێراق بڵاویکردەوە، محەمەد شیاع سودانی، سەرۆك وەزیران لە کۆبوونەوەیەکیدا لەگەڵ كۆمەڵێك شێخی عەشیرەت و كەسایەتییە دیارەكانی پێكهاتە جیاوازەكان رایگەیاند، عێراق رۆڵێكی سەركردایەتیی گرنگی هەیە و ئەو ئاوەدانكردنەوە و گەشەپێدانەی كە شاهیدییەتی، لە بەسرە تا نەینەوا قۆناغێكی بێوێنەیە.
وتیشی، حكومەت لە سەرەتاوە كار لەسەر ئەولەویەتەكان دەكات لەسەر بنەمای پێداویستییەكانی خەڵك، دوور لە هەر ئامانجێكی كەسی یان حزبی و ناتوانین داهاتووی وڵات بە تەنها لەسەر نەوت رەهن بكەین، بەتایبەتی كە عێراق خاوەنی لایەنی كشتوكاڵ، پیشەسازی و گەشتیاریی خۆیەتی.
ئاماژەی بەوەشكرد، “كاركردن لەسەر پرۆژەی گواستنەوەی غاز بۆ وێستگەكانی كارەبامان بەردەوامە، ئیرادەیەكی راستەقینە هەیە بۆ بەدیهێنانی چاكسازی و هەنگاوی گرنگمان ناوە”.
سودانی لە درێژەی قسەکانیدا ئەوەشی وت، “ئێمە توانیمان بە مامەڵەكردنی ژیرانە و بەرپرسیارانە، عێراق بپارێزین تا نەکەوینە گۆڕەپانی شەڕ و ململانێكانەوە، لەکاتێکدا هەندێك لایەن دەیانویست عێراق بچێتە شەڕ و ململانێ”.
جەختیشیکردەوە، بەرژەوەندیی عێراق و عێراقییەكان لە پێشینەی كارەكانی حكومەتدایە و رێبازی حكومەت پاراستنی بەرژەوەندییە باڵاكانی دەوڵەتە.