هاكان فیدان، وەزیری دەرەوەی توركیا رایگەیاند، وڵاتەكەی روبەڕوبونەوەی لەگەڵ ئیسرائیل لە سوریا ناوێت.
ئاوێنە: هاكان فیدان، وەزیری دەرەوەی توركیا، ئەمڕۆ هەینی، لە پەراوێزی كۆبونەوەی وەزیرانی دەرەوەی هاوپەیمانی ناتۆ لە برۆكسل، لە چاوپێكەوتنێكدا لەگەڵ رۆیتەرز وتیشی، هەڵسوكەوتی ئیسرائیل لە سوریا، رێگە خۆشدەكات بۆ ناسەقامگیریی ناوچەكە لە داهاتودا.
فیدان ئاماژەی بەوەشدا، ئەگەر ئیدارەی نوێی دیمەشق خوازیاری ئەوە بێت لەگەڵ ئیسرائیل بگاتە "لێكتێگەیشتنێكی دیاریكراو"، ئەوە پەیوەندی بە سوریا خۆیەوە هەیەو كاری تایبەتی خۆیەتی، هەروەها ئیسرائیلیش وەك توركیا دراوسێی سوریایە.
لە بەشێكی دیكەی قسەكانیدا هاكان فیدان لەبارەی هەڕەشەكانی سەرۆكی ئەمریكا بۆ وەشاندنی گورزی سەربازی لە ئێران، وتی، دیپلۆماسییەت پێویستە بۆ چارەسەركردنی كێشەكان و ئەنقەرە خوازیاری ئەوە نییە هیچ هێرشێك بكرێتە سەر ئێرانی دراوسێی.