دۆناڵد ترەمپ، سەرۆکی ئەمریکا بە فەرمانێک، وەستانی تیکتۆکی بۆ ماوەی 75 رۆژی دیکە لە وڵاتەکەیدا دواخست.

ئاوێنە: لە بەیاننامەیەکدا ترەمپ دوپاتیکردەوە، ئیدارەکەی هەوڵی زۆری داوە بۆ دۆزینەوەی چارەسەرێک کە تیکتۆک لە وڵاتەکەدا بە چالاکی بهێڵێتەوە و ئەمەش پێویستی بە کارکردنی زیاتر هەیە.

ئاماژەی بەوەشکرد، “ئێمە پێشکەوتنی گەورەمان بەدەستهێناوە لە هێشتنەوەی تیکتۆک لە ئەمریکا و ئامانجی سەرەکیشمان، رێگریکردنە لە وەستانی بەرنامەکە”.

هاوکات خواستی خۆیشی دەربڕی بۆ هاوکاریکردنی بەرنامەکە و ئیدارەی چین، بۆ گەیشتن بە رێککەوتنێک کە خزمەت بە هەموو لایەک بکات.

ئەم پێشهاتە دوای چەند مانگێک لە گرژی و ئاڵۆزیی نێوان واشنتن و پەکین دێت، لەسەر ئایندەی بەرنامەی تیکتۆک، کە یەکێکە لە دیارترین بەرنامەی تۆڕی کۆمەڵایەتی لە جیهاندا.

لەئێستادا تیکتۆک؛ کە کۆمپانیایەکی چینییە، کەوتووەتە ژێر فشاری ئەمنی و سیاسییەوە، بەهۆی نیگەرانییەکان لەوەی کە رەنگە داتای بەکارهێنەرانی ئەمریکا بۆ مەبەستی سیخوڕی یان سیاسی، لەلایەن چینەوە بەکاربهێنرێت.