بزوتنەوەی گۆڕان-كوردسات، رایدەگەیەنێت، لەژێر راسپاردەو رێنمایی كۆمسیۆنی باڵای سەربەخۆی هەڵبژاردنەكاندا، رۆژی پێنجشەممە 10ی نیسان، كۆنفرانسی نیشتمانی دەبەستن و بۆ ئەو مەبەستەش هەمو ئامادەكارییەكیان كردوە.

ئاوێنە: سایتی رەسمی بزوتنەوەی گۆڕان-كوردسات، لەزاری رۆڤان سەروەت، رێپێدراوی بزوتنەوەی گۆڕان لە ئۆفیسی سلێمانی کۆمسیۆنی باڵای سەربەخۆی هەڵبژاردنەکانەوە بڵاویكردۆتەوە كە ئەمڕۆ هەینی (4/4/2025) لەژێر راسپاردەی بڕیاری سەرۆکی کۆمسیۆنی باڵای سەربەخۆی هەڵبژاردنەکانی عێراق و پاڵپشت بە نوسراوی فەرمانگەی پارت و رێکخراوە سیاسییەکان ژمارە (875)، لە رێککەوتی (27/3/2025)، بە فەرمی ئاگادار کراینەوە بۆ بەستنی کۆنفڕانسی نیشتمانی بزوتنەوەی گۆڕان لە رۆژی پێنجشەممە (10/4/2025).

وتیشی:"وەکو بزوتنەوەی گۆڕان هەمو ئامادەکارییەکانمان تەواو کردوە بۆ ئەوەی لەژێر ڕاسپاردە و ڕێنماییەکانی فەرمانگەی پارت و رێکخراوە سیاسییەکانی کۆمسیۆنی باڵای سەربەخۆی هەڵبژاردنەکان و ئۆفیسی پارێزگای سلێمانی کۆمسیۆن لەو رۆژەدا کۆنفڕانس ببەستین."

ئەوەش لەكاتێكدایە كە دوێنێ پێنجشەممە، دەستەی گشتی بزوتنەوەی گۆڕان-گردی زەرگەتە، لە كۆنگرەیەكی رۆژنامەوانیدا وتی، سەرجەم ئامادەكارییە پێویستەكانمان لەهەمو رویەكی كارگێڕی و لۆجیستی و یاسایی تەواوكردون بۆ بەستنی سێیەمین كۆنفرانسی نیشتمانیی بزوتنەوەی گۆڕان، ئەوەش پاڵپشت بە بڕیارەكانی ئەنجومەنی كۆمیسیارانی كۆمسیۆنی هەڵبژاردنەكان تایبەت بەم بابەتە.

هێمای بۆ ئەوەش كرد، پاڵپشت بە نوسراوی فەرمانگەی پارت و رێكخراوەكانی كۆمسیۆن، سەعات 10ی سەرلەبەیانی رۆژی شەممە 5ی نیسانی 2025، سێیەمین كۆنفرانسی نیشتمانی بزوتنەوەكە لە هۆڵی كۆنفرانسەكان لە مەكۆی سەرەكی بزوتنەوەی گۆڕان لە گردی زەرگەتەی سلێمانی بەڕێوەدەچێت.