پاشنیوەڕۆی ئەمڕۆ هەینی، لە چوارچێوەی جێبەجێكردنی رێككەوتنی نێوان هەسەدە و ئیدارەی دیمەشقدا، هێزە سەربازییەكان لە هەردو گەڕەكە كوردییەكەی شاری حەڵەب دەستیان بە كشانەوە كرد. ئەركی پاراستنی هەردو گەڕەكەكە رادەستی هێزەكانی ئاسایشی ناوخۆی رۆژاڤا دەكرێت.
ئاوێنە: بەپێی میدیاكانی رۆژئاوای كوردستان، پاشنیوەڕۆی ئەمڕۆ هەینی، هێزە سەربازییەكان بە چەكەكانیانەوە لە هەردو گەڕەكی كوردنشینی شێخ مەقسود و ئەشرەفیەی حەڵەب دەستیان بە كشانەوە كرد، ئەوەش لەچوارچێوەی جێبەجێكردنی بەندی شەشەمی ئەو رێككەوتنەی كە رۆژی 1ی ئەم مانگە لەنێوان ئەنجومەنی گشتی ئەو دو گەڕەكە كە سەربە هەسەدەیە و ئیدارەی دیمەشقدا ئیمزاكرا.
بەگوێرەی رێككەوتنەكە كە لە 14 بەند پێكدێت، دو بنكەی هێزەكانی ئاسایشی ناوخۆ، ئەركی پاراستنی هەردو گەڕەكەكە دەگرنە ئەستۆ.
یەكینەكانی پاراستنی گەل-یەپەگە و یەكینەكانی پاراستنی ژنان-یەپەژە، ئەمڕۆ لەگەڵ راگەیاندنی كشانەوەی هێزەكانیان لەو دو گەڕەكە لە كۆنگرەیەكی رۆژنامەوانیدا رایانگەیاند، ئەركی پاراستنی هەردو گەڕەكەكە رادەستی هێزەكانی ئاسایشی ناوخۆی رۆژاڤا دەكرێت.
ئەوەش لەكاتێكدایە دوێنێ پێنجشەممە، یەكەم بەندی رێككەوتنەكە جێبەجێكرا كە پەیوەندیداربو بە ئاڵوگۆڕی دیلەكان و تێیدا 146 دیلی سەربە هەسەدە و 97 دیلی سەر بە هێزەكانی دیمەشق، لەبەردەم فولكەی شێخان لە دەوروبەری گەڕەكی ئەشرەفیە، لەنێوان هەردولادا ئاڵوگۆڕكران.
ئامانج لە رێككەوتنەكە "پتەوكردنی پێكەوەژیان و پاراستنی دانیشتوان و نەهێشتنی دیاردەی چەكداری و یەكلاكردنەوەی چارەنوسی ئاسایش و گەرەنتیكردنی نوێنەرایەتی گەڕەكە كوردییەكانی حەڵەبە."