سەرۆکی دەستەی گشتی ناوچە کوردستانیەکانی دەرەوەی ئیدارەی هەرێمی کوردستان پێی وایە لەبەرئەوەی ماددەی 140 جێبەجێ نەكراوە، سەرژمێری لە ناوچە جێناكۆكەكان "تەندروست نییە." دەشڵێت: گومانیشیان لەوە هەیە لە چەند ساڵی داهاتودا حکومەتی عێراقی سەرژمێرییەکە بۆ "مەرامی سیاسی" بە کاربهێنێت.

ئاوێنە: فەهی بورهان، سەرۆکی دەستەی گشتی ناوچە کوردستانیەکانی دەرەوەی ئیدارەی هەرێمی کوردستان، ئەمڕۆ چوارشەممە، بە دەنگی ئەمەریکای ڕاگەیاند،"لەبەر ئەوەی مادەی 140 جێبەجێ نەکراوە سەرژمێرییەکە ناتوانێت سەرژمێرییەکی تەندروست بێت، چونکە کورد ناتوانێت بەو مافە یاسایی و دەستورییەی کە هەیەتی لە شارەکاندا پێبگات."

وتیشی،"ڕاستی ئەم سەرژمێرییەی کە حکومەتی عێراقی بانگەشەی گەشەپێدانی بۆ دەکات ئێمە گومانمان هەیە لە داهاتودا و لە پێنج بۆ 10 ساڵی داهاتودا بگۆڕێت بۆ مەرامێکی سیاسی، هەروەکو چۆن سەرژمێرییەکانی سەردەمی پاشایەتی یان لەسەردەمی کۆماری و دواتر لە سەردەمی کۆماریش لەسەردەمی حزبی بەعسدا بۆ مەرامی سیاسی و بچوکكردنەوەی جوگرافیای کوردستان و گۆڕینی دیموگرافیای ناوچەکان بەکاریان هێنا."

سەرۆکی دەستەی گشتی ناوچە کوردستانیەکانی دەرەوەی ئیدارەی هەرێمی کوردستان ئەو هەواڵەی پشتڕاستکردەوە کە لە بازگەکانی سنوری پارێزگای کەرکوک دوێنی سێشەممە 19ی 11ی 2024، لەکاتی گەڕانەوەی خەڵکی ڕەسەنی شاری كەركوك لە سنورەکانی سلێمانی و هەولێر بۆ کەرکوک ڕێگرییان لێکراوە، بەڵام دواتر چارەسەرکراوە و ڕاشیگەیاند" ئومێد دەکەین پرۆسەکە بەباشی بەڕێوەبچێت و سەرئەنجام سەرژمێرییەکە بۆ گەشەسەندن بەکاربهێنرێت نەک بۆ مەرامی سیاسی."

فەهی بورهان، سەرۆکی دەستەی گشتی ناوچە کوردستانیەکانی دەرەوەی ئیدارەی هەرێمی کوردستان، ڕاشیگەیاند،"ئێمە لەسەرەتاوە نیگەرانبوین لە مەسەلەی ئەنجامدانی سەرژمێری لەناوچە کوردستانیەکانی دەرەوەی ئیدارەی هەرێم واتا لە خانەقینەوە تا شەنگال، هۆکارەکەشی ئەوەبوە پێمان وابوە مادەیەکی دەستوری هەیە کە ئەویش مادەی 140ە جێبەجێنەکراوە، بنەمای یەکەمی مادەکەش باس لە ئاساییکردنەوەی دۆخی ئەم ناوچانە دەکات و دۆخی ئەم ناوچانەش ئاسایی نییە لەبەر ئەوە ئەنجامدانی سەرژمێری لە شوێنکدا ئاسایی نەبێت من پێم وایە ناتوانێت ئامانجەکەی بەدی بهێنێت."

وتیشی،" ئێستا سەرژمێرییەکە ئەنجام دەدرێت و لەناو پرۆسەکەداین و لەڕوی ئیدارییەوە ئامادەکاری باشی بۆ کراوە، بەڵام ڕەنگە بێ گرفتیش نەبێت بەتایبەت لە ڕوی کردنەوەی تابلێتەکان و زۆر جار بژمێرەکان لەگەڵ خەڵکی لەسەر هەندێک خاڵ و بڕگەی پرسیارەکان جۆرێک لە گرفت دروست ببێت."