سوپای ئیسرائیل، ئەمڕۆ هەینی، كوشتنی ویسام حازم-ی لە جنین راگەیاند و دەڵێت، بەرپرسی حەماس بوە لە كەرتی رۆژئاوای فەلەستین.
ئاوینە: سوپای ئیسرائیل لە راگەیەندراوێكدا وتویەتی، پاسەوانانی سنوری وڵاتەكەی، ویسام حازم-یان لە جنین كوشتوە كە بەرپرسی بزوتنەوەی حەماس بوە لە كەرتی رۆژئاوا.
بەگوێرەی قسەی سوپای ئیسرائیل ویسام حازم بەرپرسیاری فەرماندان و جێبەجێكردنی كردەوە تەقەكردن و تەقینەوەی بۆمبە چێنراوەكان و چەند كردەوەیەكی دیكە بوە لە كەرتی رۆژئاوا.
سوپای ئیسرائیل رێوشوێنە ئەمنییەكان و كردەوە سەربازییەكانی لە كەرتی رۆژئاوای فەلەستین توندكردونەتەوەو ئەوەش كوژران و برینداری هاوڵاتیانی فەلەستین لە كەرتی رۆژئاوا لێ كەوتۆتەوە.
ئیسرائیل رایگەیاندوە لە كردەوە سەربازییەكانیدا لە كەرتی رۆژئاوا دەیەوێت هەر دیاردەیەكی چەكداری كۆنترۆڵ بكات و ئێران تۆمەتبار دەكات بە پێدانی چەك بە چەند گروپێك لە كەرتەكە.