وەزیری دەرەوەی ئێران لە پەیوەندییەكی تەلەفۆنیدا لەگەڵ هاوتا ئیتالییەکەى ڕایگەیاند، تاران هەوڵ نادات گرژی و ئاڵۆزییەكان لە ڕۆژهەڵاتی ناوەڕاست زیاد بكات، بەڵام وەڵامیان بۆ تیرۆركردنی ئیسماعیل هەنیە، بەرپرسی پێشووی مەكتەبی سیاسی حەماس یەكلاكەرەوە و كاریگەر دەبێت.
میدیا عەرەبییەكان لەبارەی ناوەڕۆكی پەیوەندییە تەلەفۆنییەكەی عەباس عێراقچی وەزیری دەرەوەی ئێران و هاوتا ئیتالییەکەى زانیاری نوێ دەخەنەڕوو.
میدیاكان بڵاویان كردەوە، ئەنتۆنیۆ تایانی وەزیری دەرەوەی ئیتالیا پەیوەندییەكی تەلەفۆنی لەگەڵ عەباس عێراقچی وەزیری دەرەوەی ئێران ئەنجام داوە و پیرۆزبای دەستبەكاربوونی لێكرد، هەروەها تاوتوێی دۆخی ڕۆژهەڵاتی ناوەڕاستیان كردووە.
ئاماژە بەوەشكراوە، عەباس عێراقچی بە هاوتا ئیتالییەكەی وتووە، تاران هەوڵ نادات گرژی و ئاڵۆزییەكان لە ڕۆژهەڵاتی ناوەڕاست زیاد بكات، بەڵام وەڵامیان بۆ تیرۆركردنی ئیسماعیل هەنیە، بەرپرسی پێشووی مەكتەبی سیاسی حەماس یەكلاكەرەوە و كاریگەر دەبێت.
جێگاى ئاماژەیە، دوای ئەوەی ئێران چەند جارێك بەڵێنی وەڵامدانەوەی توندی ئیسرائیلی دایەوە، ماوەی چەند هەفتەیەكە مەترسى لە هەڵگیرسانی شەڕ لە ناوچەكە زیادی كردووە، بەشێك لە میدیاكانیش ئاماژە بەوەدەكەن، دوای كۆتایی هاتنی چلەی ماتەمینی ئیمام حوسێن ئێران هێرش دەكاتە سەر ئیسرائیل.