سەرۆکی پەرلەمانی ئێران لە 43هەمین ساڵیادی دەستبەسەرداگرتنی باڵیۆزخانەی ئەمەریکا لە تاران، رایگەیاند، ئەمەریکا ئەنجامدەر و پشتیوانی ئەو تاوانانەیە کە لە غەززە دەکرێن. وتیشی، "ئێستا گەورەترین جیهاد لە بەرامبەر ئەمەریکا، هەوڵدانە بۆ چارەسەرکردنی کێشە ئابوورییەکانمان".
لە 43هەمین ساڵیادی دەستبەسەرداگرتنی باڵیۆزخانەی ئەمەریکا لە تاران، وەک هەموو ساڵانی پێشوو خۆپێشاندان لە تاران و هەموو شارەکانی ئێران بەڕێوەچوو.
محەممەد باقر قالیباف، سەرۆکی پەرلەمانی ئێران لە لێدوانێکدا بۆ خۆپێشاندەرانی تاران بە ئاماژەکردن بە مێژووی ناکۆکییەکانی نێوان ئێران و ئەمەریکا و ئەو شەڕەی ئێستا لە غەززە لە نێوان ئیسرائیل و حەماس لە ئارادایە؛ جەختی کردەوە "ئەمەریکا بڕیاردەر و ئەنجامدەر و تاوانباری ئەم جەنگەیە".
سەرۆکی پەرلەمانی ئێران وتیشی، "ئێمە بە ڕوونی و بە دیاریکراوی، ئەمەریکای تاوانبار بە تاوانباری سەرەکی و ئەنجامدەری هەموو ئەو تاوانانە دەزانین کە لە فەڵەستین دەکرێن. ئەو بەرپرسی ئەو تاوانانەیە؛ ئیسرائیل بە فەرمانی ئەمەریکا و بە پشتیوانیی ئەمەریکا، دەست بۆ ئەو تاوانانە دەبات".
بە گوتەی سەرۆکی پەرلەمانی ئێران، "هێرشەکەی حەماس بۆ سەر ئیسرائیل هاوکێشە جیهانییەکان و ڕەوتی مێژووی گۆڕیوە". قالیباف بە بێ ئاماژەکردن بە پلانی وڵاتەکەی بۆ پشتیوانی لە فەڵەستین، گوتی، "ئێستا گرنگترین جیهاد لە ئێران، هەوڵدان بۆ چارەسەرکردنی ئەو کێشە ئابوورییانەیە کە لە ئەنجامی گەمارۆکانی ئەمەریکاوە بۆ خەڵکی ئێران دروست بوون".
محەممەد باقر قالیباف ئاماژەی بەوەش کرد، "گرنگترین پرسی ئێمە چارەسەرکردنی کێشە ئابوورییەکانمانە. بەرگری و هەوڵدان و چارەسەرکردنی کێشە ئابوورییەکان، ڕێک خەبات لە دژی ئەمریکایە و ئەمڕۆ حکومەت، پەرلەمان، خەڵک، بیرمەندان، کۆمپانیاکان و کەرتی تایبەت دەبێت وەک جیهاد سەیری ئەم خەباتە بکەن و بە پیرۆزی بزانن".
چل و سێ ساڵە کۆماری ئیسلامیی ئێران و ئەمەریکا هیچ پەیوەندییەکی ڕاستەوخۆی سیاسی، دیپلۆماسی و ئابوورییان پێکەوە نییە و ئەم پچڕانی پەیوەندییە و ئەو گەمارۆیانەی ئەمەریکا خستوویەتە سەر ئێران، زیانێکی زۆری لە ئابووریی ئەم وڵاتە داوە، بەڵام دەسەڵاتدارانی ئێران هەر ئەمەریکا بە گەورەترین دوژمنی خۆیان دەزانن و لەسەر ئەو دژایەتیکردنەش بەردەوامن.