پەرلەمانی عێراق یاسای بەپارێزگابونی هەڵەبجەی رەوانەی سەرۆكایەتی كۆمار كرد و وەزارەتی پلاندانانی عێراقیش نەخشەی پارێزگاكەی وەك 19یەمین پارێزگای عێراق پەسەندكردوە.

ئاوێنە: شاخەوان عەبدوڵا، جێگری دوەمی سەرۆكی پەرلەمانی عێراق، لە راگەیەندراوێكدا وتی، ئەمڕۆ یەكشەممە، یاسای بەپارێزگابونی هەڵەبجەمان ڕەوانەی سەرۆکایەتی کۆمار کرد .

هەر ئەمڕۆ كاروان یاروەیس، پەرلەمانتاری كورد لە پەرلەمانی عێراق رایگەیاند، بەپێی نەخشەیەک کە وەزارەتی پلاندانانی عێراق پەسەندی کردوە، سنوری پارێزگای هەڵەبجەی وەک (19)یەمین پارێزگای عێراق کە رۆژی 14/4/2025 پەرلەمانی عێراق یاساکەی پەسەندکرد، دیاری کراوە.

ئەو پەرلەمانتارە وتوشیەتی، بەپێی نەخشەکە سنوری پارێزگاکە ناحیەکانی سیروان و خورماڵ و بیارە و بەمۆ دەگرێتەوەو قەزای هەڵەبجەش ناوەندی پارێزگاکەیە.

ئەوەشی خستۆتەڕو، سنوری دەرەوەی پارێزگاکە هەمو بە کۆماری ئیسلامی ئێرانەوەیەو لەناوخۆش هاوسنوری پارێزگاکانی سلێمانی و دیالەیە.

هێمای بۆ ئەوەش كردوە، لەخشتەکەدا هێشتا خورماڵ وەک ناحیە ناوی هاتوە هەرچەندە لەلایەن حکومەتی هەرێمەوە کراوە بە قەزا.

وتوشیەتی، نەخشەکە لەلایەن وەزیری پلاندانانی عێراق د. محەمەد تەمیم و بەرێوەبەرایەتی و بەشە پەیوەندارەکانی وەزارەتەکەوە ئیمزا کراوە.