میدیای حووسییەکان بڵاوی کردەوە، هێزەکانی ئەمریکا جارێکی دیکە ژمارەیەک هێرشی ئاسمانیان کردە سەر پێگە و سەکۆی مووشەکی حوسییەکانلە پارێزگای حودەیدەی یەمەن.
ئاوێنە: میدیای حووسییەکان، سەبارەت بە هێرشی ئەمریکا بۆسەر بنكەكانیان بەم شێوەیە زانیارییان بڵاوکردەوە، بەیانی ئەمڕۆ هێزەکانی ئەمریکا جارێکی دیکە ژمارەیەک هێرشی ئاسمانیان کردە سەر پێگە و سەکۆی مووشەکیی گرووپەكەمان لە پارێزگای حودەیدەی یەمەن.
ئاماژەیان بەوەکردووە، هێزەکانی ئەمریکا چەندین ناوچەی دیکەی یەمەنیان بۆردوومانکردووە و بەهۆیەوە ١٢کەس کوژرا و ٣٠ کەسی دیكەش برینداربوون.
دەشڵێن، ئەمریکا شارەکانی سەنعا، حودەیدە هەروەها کەنار دەریاکان و چەند گەڕەکێکی لە پایتەختی یەمەن کردووەتە ئامانج.
هاوكات، ئەمریکا لە دوێنێوە ٢٣ جار هێرشی کردووەتە سەر حووسییەکانی یەمەن و بەهۆیەوە کەسێک کوژرا و ١٠ کەسیش برینداربوون.
جێگای ئاماژەیە، لە دوای ٧ـی تشرینی یەكەمی ساڵی ٢٠٢٣ و لە پاش سەرهەڵدانی شەڕی حەماس و ئیسرائیل، حووسییەكانی یەمەن پشتیوانی خۆیان بۆ حەماس دووپات كردەوە و ڕایانگەیاند، لە دەریایی سوور هەر كەشتییەكی ئیسرائیل یان وڵاتانی دیكە بەرەو ئیسرائیل بچێت دەیكەنە ئامانج.