ئا: ئیمان زەندی

سەرباری هەوڵ‌و فشارە دەرەکییەکان بۆ یەکخستنەوەی هێزەکانی ٧٠و٨٠ی پێشمەرگە بەڵام تائێستا بێئەنجام بووە، هەرچەندە وڵاتانی هاوپەیمانان وادەیەکیان بۆ یەکخستنەوەکە دیاریکردووە، بەڵام بەپێی زانیارییەکانی شارەزایانی سەربازی‌و وەزارەتی پێشمەرگە کە قسەیانکردووە بۆ ئاوێنە ئەو یەکگرتنەوەیە "ئەستەمە"، بەهۆی کێشەی سیاسی زۆنی سەوزو زەردو بەرژەوەندی وڵاتانی دراوسێ بەو دوو هێزە.

یەکنەگرتنەوەی هێزەکانی ٧٠و٨٠ "کێشەی سیاسییە"

مێژووی قسەکردن لەسەر یەکخستنەوەی هێزی پێشمەرگە لەهەرێمی کوردستان دوورو درێژە، بەپێی هەوڵە ناوخۆییەکان لەساڵی ١٩٨٦ رێککەوتنی تاران هەیە لەنێوان مام جەلال‌و ئیدریس بارزانی، بۆ یەکخستنەوەی هێزی پێشمەرگە، پاشان لەدوای ساڵی ١٩٩٢و ٢٠٠٧ کە وەزارەتی پێشمەرگە بەیەکگرتووی دامەزرا هەوڵەکان چڕتر کرانەوە بۆ یەکخستنەوەکە، واتە لەساڵی ٢٠١٠ چواردە لیوای هاوبەش دروستکرا، بەڵام لەکاتی دابەشکارییەکەیداو زاڵبوونی مۆرکی حیزبایەتی هێزەکان زیاتر فراوان بوون. دواترینیشیان، بڕیاری ژمارە ١٩ی ٢٣ی تەمموزی ٢٠١٤ بوو، لەبڕگەی چوارەمی بڕیارەكەی پەرلەماندا هاتووە "پێویستە لەسەر حكومەتی هەرێم هەموو هێزەكانی پێشمەرگە لەماوەی ٦ مانگ لەدەرچوونی ئەم بڕیارەوە لەچوارچێوەی وەزارەتی پێشمەرگەدا وەك هێزێكی نیشتیمانی یەكبخات، بەتایبەتی یەكەكانی (٧٠و٨٠)ی هێزی پێشمەرگەی كوردستان".

هادی ئەکرەم، بەڕێوەبەرى جێبەجێکار لەبەڕێوەبەرایەتى خانەنشینی پێشمەرگەى سلێمانى لەبارەی ئەوەی بۆچی هێزەکانی پێشمەرگە یەکناگرنەوە؟ لەلێدوانێکی تایبەتدا بەئاوێنەی وت "ئەمانە لەبەرئەوەی ئەوەلیات‌و فایل‌و شتەکانیان ناتەواوە یەکخستنەوەکە بەوجۆرە دواکەوت، وەزارەتی دارایی پێیوتوون؛ ئەوەلیاتەکانیان رێکبکەنەوە ئەوکاتە وەریدەگرین".

وتیشی "لیستەکانیان بەوەجبە وەجبە دێتەوە سەر وەزارەتی دارایی، ئێستا لیستێکی چوار هەزارو ٣٠٠ کەسی گەیشتووە بەڵام ئەولەیاتەکانیان هێشتا نەگەیشتووە، بەپێی یاسای یەکگرتنەوەکە بێت، دەبێت دەستەیەکی گشتی وەکو بەغدا کە (هەیئەی گشتی خانەنشینی)یە لەکوردستانیش دروستببێت‌و تیایدا سەرجەم خانەنشینانی هێزی ٧٠و٨٠ یەکبخرێتەوە".

لایخۆشیەوە شارەزایەکی سەربازی بەناوی لیوا محەمەد سابیر هەمەوەندی بۆ ئاوێنە نائومێدی خۆی نەشاردەوە لەوەی کە ئەم هێزانە "یەکناگرنەوە"، بەڵکو دەشڵێت "لیوای زیاتر دروستدەکەن وەکو پێشبڕکێ".

راشیدەگەیەنێت "تەمەنا دەکەم هێزی ٧٠و٨٠ بچنەوە سەر وەزارەتی پێشمەرگەو ببن بەهێزی هەموو لایەک‌و هی حزب نەبن. بەڵام ئەم حزبانە بەکاریاندەهێنن تا بگەن بەدەسەڵات‌و بمێننەوە یان خەڵک‌و میللەتی پێ بتۆقێنن، تەنانەت بەکاریشیدەهێنن بۆ فشاری دەنگ لەهەڵبژاردندا، هەربۆیە هێزی ٧٠و٨٠ لەسەر ئەساسی حزبی دامەزراون زۆر زۆر زەحمەتە یەکبگرنەوە چونکە ئیرادە نییە، ئەگەر تێکەڵیشی بکەن تەنیا بەرووکەشی دەبێت".

هەمەوەندی وتیشی "بەنمونە پارتی دوو لیوایە، یەکێتیش دەبێت بیکات بەدوو لیوا، یان گەر لەبەرژەوەندی حزب نەبێت نایکەن. ئەمانە بۆ ئەوە دروستکراون یەکنەگرن‌و خێسەش لەیەکتری بکەن، هەروەها وەزارەتی پێشمەرگە حزبیە لەنێوان ئەو دوو حزبەو لەسەر ئەکادیمیایەکی تەندروست دروست نەبووە".

لەبەرامبەردا لیوا بەختیار محەمەد، ئەمینداری گشتی وەزارەتی پێشمەرگە لەلێدوانێکی تایبەتدا بەئاوێنەی وت "ئەم دوو هێزە ساڵی ٢٠١٠ وەزارەتی پیشمەرگەیان دروستکردووە، هەنگاوەکان بەردەوامە بۆ یەکخستنەوەی هێزی پێشمەرگە ئەگەرچی بەهێواشیش بەرەوپێشدەچێت جێی خواستی ئێمە نییە، بەڵام نەوەستاوە".

ئەمیندارەکەی وەزارەتی پێشمەرگە هێمای بۆ ئەوەشکرد "زوو پێکهێنانی حکومەت هۆکارێکە پرۆسەکە بەرەوپێشەوە ببات، بۆیە یەکخستنەوەکە هۆکاری شەخسی نییە، بەڵکو ئاڵنگاری هەیە لەبەردەم پرۆسەکە".

لەلایەکی دیکەشەوە عەبدولقادر هەرکی، شارەزای بواری ئەمنی‌و ستراتیژی نێودەوڵەتی، کە هاوکات بەرپرسی پەیوەندییەکانی مەڵبەندی سێی هەولێرە لەبارەی ئەوەی هێزی ٧٠و٨٠ کامیان زیاتر بەربەستن لەیەکگرتنەوەکە؟ لەگفتوگۆیەکیدا لەگەڵ پەیامنێری ئاوێنە، وتی "ئەگەر لەمن بپرسن من دەڵێم کێشەکان لای هێزەکانی ٨٠یە، لەبەرئەوەی کێشە گەورەکە سیاسییە گەر ئەوەش ئاسان بێت قۆناغەکانی دیکە ئاسان نین، هاوکێشە جیهانی‌و ئیقلیمییەکان وایانکردووە سیاسەتێکی یەکگرتوو لەهەرێم نەبێت".

وتیشی "ناو وەزارەتی پێشمەرگە رێگرە لەبەردەم ئەوەی وەزارەتی دارایی هێزەکان یەکبخات، دووەم تاوەکو ئێستا ئاڕاستەیەکی یەکگرتووی نیشتیمانی بۆ هێزی پێشمەرگە دیارینەکراوە".

هەرکی ئاماژەی بەوەشکرد "لەنێوان سنورەکانی زۆنی سەوز بەداخەوە هێزی جودا جودا لەژێر ناوی جودا جودا لەناو وەزارەتی پێشمەرگەدان‌و لەناو لیواکانیشدا هەیە، ئەمەش وادەکات لەنێوان دوو ئیدارەیی دوو سیاسیەتی جیاواز یەکخستنەوەی هێزی پێشمەرگە ئاسۆیەکی روونی نەبێت".

لەناو هێزەکانی ٨٠ چەکداری رۆژهەڵاتی‌و رۆژئاوایی بوونی هەیە

لەوبارەیەوە عەبدولقادر هەرکی وتی "لەزۆنی زەرد کێشەو هێزی جیاواز هەیە، هێز هەیە جێگیرکراونەتەوە نێو یەکەی ٨٠و بەهۆکاری ئەوەی ئەم هێزانە ناسنامەو کارتی نیشتیمانی نییەو دۆسیەیان لەبەغدا نییە".

سەبارەت بەوەی خەڵکی کوێن؟ ئەو وتیشی "خەڵکی رۆژئاوای کوردستان‌و سوریان‌و لەباکورو رۆژهەڵاتی کوردستانیشیان تێدایە".

ئەو شارەزای ئەمنی‌و ستراتیژیە لەسەر هۆکارەکەی‌و ناوی ئەو هێزانە، وتی "ئێستا فۆکسی زۆر گەورە لەسەر هێزەکانی رۆژئاوایە، دەپرسین هێزەکانی رۆژئاوا لەکوێی وەزارەتی پێشمەرگە جێیان گرتووە! گوژمەی مووچەکانیان پێدەدرێت لەکوێیە؟ پاڵپشتی دارایی لۆجیستی‌و جبەخانەیی‌و راهێنان بەچ پاڵپشتی چ دارایی‌و هێزێک وە چ سیاسەتێک‌و لەلایەن کامە وڵاتی ئیقلیمییەوە بۆی دابیندەکرێت؟ ئەمانە وەڵامەکانی دیارە، وەزارەتی پێشمەرگە رێگرە لەلیستی مووچەو مانگانە کێشەی بۆ دروست دەبێت‌و لیژنە دێت‌و دەڕوات بۆ بەغدا ئەمە دیارە لەرووە داراییەکەوە، لەلایەن راهێنان‌و پڕچەککردن‌و مەشقەوە جبەخانەکەیان دیارە ئێستا لەکوێ بەکاریدەهێنن، هەروەها ئەوەش روونە وڵاتی تورکیا بۆ گەڕانەوەی ئەو هێزانە چ فشارێک لەپارتی دەکات بۆ رێککەوتنێک تا ئەو چەکدارانە بگەڕێنەوە بۆ رۆژئاوا".

وتیشی "هەندێک لەهێزەکانی رۆژهەڵاتی کوردستان وەکو (پاک) ئەمانە بەشێکن لەمەنزومەیەکی سەربازی کە پاڵپشتی دارایی‌و جبەخانەیی‌و لۆجستی لەدەرەوەی ئەم چەترە نیشتیمانیەیە، چونکە لەناو مەنزومەیەکی سەربازی ناتوانن رێکیانبخەن نەناسنامەی عێراقی تەواویان هەیە، نەلەڕووی سیاسییەوە لەژێر چەتری وەزارەتی پێشمەرگەن".

"ئەمریکا لەبەر بەرژەوەندی خۆی یەکخستنەوەکەی دواخستووە"

لەوبارەیەوە لیوا بەختیار محەمەد رایگەیاند "ئەمریکا لەگەڵ بەغدا پرۆژەی رێککەوتنامەی ستراتیجی هەیە، بەشێكی ئەو پلان‌و ستراتجیە لەگەڵ عێراقدایەو هەرێمیش لەچوارچێوەی عێراقدا؛ ئەمریکا لەگەڵ هەرێمی کوردستاندا مامەڵە دەکات".

لەلایەکی دیکەشەوە لیوا محەمەد هەمەوەندی پێیوایە، پێشمەرگە بایی ئەوەی تیا ماوە ئەمریکا پێویستی پێبێت لەناوچەکە، ئەو وتی "سبەی کەی تەسفیەی حساباتی خۆیکرد لەناوچەکەو هێزێکی بەدیلی دیکەی دروستکرد ئەمانەش پشتگوێدەخات‌، ئەمریکا باش باش دەزانێت کە ئەمانە هێزی حزبین‌و هی گەل نین، بەبۆچونی من یەکخستنەوەشیان لەبەرەیەک بەرامبەر دوژمن حزبێکیان لەگەڵ ئەو رووبەرووبونەوەیەدا نەبێت سبەی لایەنەکەی دیکەش شکست دەهێنێت، بەڕای من واباشترە هەریەکەو لەزۆنی خۆی بێت".

بەوتەی هەمەوەندی بێت، عێراق لەبەر ئاڵۆزی کێشەی (شیعە، سوننە، داعش‌، میلیشیا، تورکیاو ئێران)، ئەمریکا دەیەوێت "وجودی" هەبێت، "بۆیە هاوکاری ئەم پێشمەرگانە دەکات واتە بەجۆرێک شەرعیەت دەدات بیاندات بەگژ ئەوانەی دژبە ئەمریکان".

فشارەکان لەسەر یەکگرتنەوەکە چڕترکراوەتەوە

لەسەر ئاستی نێودەوڵەتی لەساڵی ٢٠٠٣ لەكاتی پرۆسەی ئازادكردنی عێراقدا لەلایەن ئەمریکاو هاوپەیمانەکانییەوە، هەوڵ بۆ یەگرتن‌و بەئاراستەی دروستكردنی پێکهاتەیەکی هاوبەشی هێزی پێشمەرگە چڕکرایەوە، هەروەها لەدوای هێرشەکانی داعش لە٢٠١٤، هەنگاوەکانی یەکخستنەوەکە بەردەوامبوون، لەوچوارچێوەیەدا هێزەكانی هاوپەیمانی دژ بەداعش دوو لیوای هاوبەشی سەربازییان دروستكرد. پاشان دەستیان بەراهێنان‌و پڕچەككردنی هێزی پێشمەرگە كردو بڕی ١١٠ ملیۆن دۆلاریان بۆ تەرخانكرد. بەوتەی ئەمینداری وەزارەتی پێشمەرگەش بێت، هێزی پێشمەرگە لەچوارچێوەی هەرێمدا "هێزێکی دەستورییە".

هادی ئەکرەم باس لەوەدەکات کە یەکخستنەوەکە زۆر پەیوەندی بەهاوپەیمانانەوە نییە، "بەڵکو ئەو بەرنامەی وەزارەتی دارایی خۆیەتی، بەڵام لەوەدا نەماوە چونکە بڕیار دەرچووە بۆ یەکگرتنەوەی هەموویان‌و دەبێت ئەو کارەش بکرێت".

لەسەر هۆکار چڕکردنەوەی فشارەکانی ئەمریکاو هاوپەیمانانیش؟ عەبدولقادر هەرکی وتی "فشارەکان خۆی لەخۆیدا پەیامێکە گوزارشتە لەدۆخی داهاتوو کەپێویستە هێزی پێشمەرگە یەکبخرێت، ئەمەش دۆخێکی مەترسیدارە، ئایا پاڵپشتی هاوپەیمانان بەچ ئاڕاستەیەکە؟ بۆ جێبەجێکردنی پڕۆژەیەکی جیهانییە یان بۆ جێبەجێکردنی پڕۆژەیەکی ئیقلیمییە یان زیاتر!".

لیوا بەختیار محەمەد خاڵێکی گرنگ ئاشکرادەکات‌و دەڵێت "دەکرێت لەداهاتوودا ئەندامانی هێزەکانی پێشمەرگە بگوازرێنەوە بۆسەر هێزە ئەمنییەکانی عێراق بەڕێکەوتن بۆ پاراستنی (توازن وطنی ـ باڵانسی نیشتمانی)".

فەرماندەی دەڤەری یەک‌و دوو تەنیا گۆڕینی ناوی یەکەی ٧٠و٨٠ـیە

ئاوێنە ئەوەشی زانیووە، ساڵی ٢٠٢٦ "کۆتایی دێت" بەهێزەکانی ٧٠و٨٠و دەچنەوەسەر وەزارەتی پێشمەرگە، لەئێستاشدا شەش فیرقە دروستبووەو لەئایندەیەکی نزیکیشدا هەردوو فەرماندەی دەڤەری یەک‌و دوو دروستدەبن‌و ٧٠و٨٠ دەبن بەفەرماندەی دەڤەر، بۆ ئەوەش "هیچ کێشەیەک نەهاتووەتە پێشەوە، بەڵکو یەکێتی‌و پارتی هاوکارو هەماهەنگن".

لیوا ئەحمەد لەتیف، لەبارەی فەرماندەی دەڤەرەوە دەڵێت "ئێستا فیرقەکان پێکدەهێنرێت‌و شەشیان تەواوبووە چوار فیرقەی دیکە ماوە، وە لەگەڵ پێکهێنانی سەرکردایەتی دەڤەر فەرماندەی دەڤەر دروستدەکرێت، ئەو کاتەیە هێزەکانی ٧٠و٨٠ نامێنێت هەموو لیواکانیش دەخرێتنەسەر ئەو دوو ناوچەیەو دەبەسترێتەوە بەوەزارەتی پێشمەرگەو تاساڵی ئایندە هیچ هێزێک نامێنێتەوە".

هاوکات لیوا بەختیار محەمەدیش ئاماژە بەوە دەکات، بۆ فەرماندەیی فەرماندەی دەڤەر پێوەرێک هەیە کە "نابێت لەپلەی لیوا کەمتربێت".

بەڵام شارەزایانی سەربازی‌و ئەمنی‌و ستراتیژی لەم راپۆرتەی ئاوێنەدا پێیانوایە فەرماندەی دەڤەر تەنیا گۆڕینی ناوە، لەوبارەیەوە عەبدولقادر هەرکی ئاشکرایکرد "ئەوەی گرنگە ئایا فەرماندەی دەڤەر فەرمان لەکوێوە وەردەگرێت، ئایا ئەم فەرمانە لەسلێمانی‌و شارەزوورو هەڵەبجەو گەرمیان جێبەجێدەکرێت واتە هەمان ئەو فەرمانە لەدهۆک‌و بادینان‌و سنوری سیدەکان جێبەجێدەکرێت؟".

لەلایەکی دیکەشەوە هادی ئەکرەم وتی "جا بۆ باسی فەرماندەی دەڤەر دەکەیت دەیان هێزی جۆراوجۆر لای یەکێتی‌و پارتی هەیە لەژێر فەرمانی وەزارەتی پێشمەرگەدا نین، وەکو هێزەکانی کۆماندۆو تایبەتەکان‌و دژە تیرۆر، لای پارتیش هێزی زێرەڤانی‌و رزگاری، جگە لەوەش دەیان هێز بەناوی جۆراوجۆر هەیە لەژێر چەتری وەزارەتی پێشمەرگە نییە، ٤٠ بۆ ٥٠ هەزار پێشمەرگە چونەتەسەر وەزارەتی پێشمەرگە ئەمە کەی یەکگرتنەوەیە!".

لایخۆشییەوە لیوا محەمەد هەمەوەندی باسی ناوی جۆراوجۆر دەکات لەناو ٧٠و٨٠و دەڵێت "هەندێکجار پێیان دەڵێن هێزی موغاویری‌و موکافەحەی ئیرهابی‌و هێزی تایبەت‌و هێزی سەرۆکایەتی‌و سەرۆک‌و پاسەوانی سەرۆک لەگەڵ چەند ناوێکی سەیروسەمەرە، زیاتر لە١٠ جۆر ناو هەیە بۆ ئەم هێزانەو لەناو یەکەکەی خۆیاندا پێشبڕکێ دەکەن".

"یەکێتی بۆ پشکی خۆی لەهەولێرو پارتیش بۆ بیرە نەوتییەکان نایانەوێت یەکبگرنەوە"

لەوبارەیەوە لیوا محەمەد هەمەوەندی لەبارەی ئەوەی پارتی پارێزگاری لەچەند بیرە نەوت دەکات؟ دەڵێت "نازانم، بەڵام بیرە نەوتییەکان پێویستە بپارێزرێن چونکە حکومەتی عێراق هەرکات بیەوێت هێرشی بۆ دەکات، چونکە زۆربەیان لەنێوان سنوری هەرێم‌و بەغدایەو عێراقیش تەماحی لەوەدایە رۆژێک هێرشبکاتەسەری، جا هەربۆیە پارتی‌و یەکێتی هێزەکانیان زۆرەکەن تاوەکو گەر هێرشکرایەسەر بیرە نەوتەکان بیپارێزن، تەنیا هێزی سەربازی دامەزاردنی هەیە".

ساڵی ٢٠٢٤ زیاتر لە٢٤ هەزار کەس لەهێزەکانی ٧٠و٨٠ دامەزراون

بەگوێرەی بەدواداچونەکانی ئاوێنە کە لەسەرچاوەیەکی باوەڕپێکراوەوە دەستیکەوتووە، لەساڵی ٢٠٢٤دا زیاتر لە٢٤ هەزار کەس لەیەکەی ٧٠و٨٠ دامەزراون.

هەربەپێی بەدواداچونەکان، تاوەکو ئێستا نزیکەی ٤٠ هەزار کەسیش لەیەکەی ٧٠و٨٠ یەکخراونەتەوە، بەوتەی لیوا ئەحمەد لەتیف بێت "لە٪٦٥ بۆ ٧٠ی هێزی ٧٠ یەکیگرتووەتەوە".

ئاوێنە زانیویشیەتی، زیاتر لە١٠٠ هەزار خانەنشین وەکو سەرباز لەیەکەی ٧٠و٨٠ هەن، مەدەنی‌و سەربازی بەیەکەوە زیاتر لە٢٧٠ هەزار کەسە. فەوجێک ٢بۆ٣ هەزار سەربازە هەروەها لیوایەکیش ٤ بۆ٥ هەزارە. هاوکات بەپێی زانیارییەکانی عەبدولقادر هەرکی "بۆ یەک هێز زیاتر لە٢٠ لیوا بوونی هەیە".

هەروەها بەگوێرەی لێدوانی لێپرسراوانی وەزارەتی پێشمەرگە، حکومەتی عێراق تەنیا مووچەی ٢٣ هەزار پێشمەرگە دابیندەکات، لەکاتێکدا ژمارەی کارمەندانی وەزارەتەکە بەخانەنشینەکانییەوە، سەرووی ٤٠٠ هەزار مووچەخۆرە. هاوکات حکومەتی هەرێم بۆ مووچەکانیشیان مانگانە پێویستی بە١٣٣ ملیار دینارە، بەڵام ئەو بڕە پارەیەی حکومەتی عێراق بۆ وەزارەتەکە تەرخانیکردووە مانگانە نزیکەی ١٩ ملیار دینارە.

هاوکات نزیکەی ١٠ ساڵیشە هاوپەیمانان‌و ئەمریکا هەوڵی یەکخستنەوەی هێزەکانی پێشمەرگە دەدەن‌و تاوەکو ئێستا تەنیا ٢٤ لیوای یەکگرتووی پێشمەرگە هەیە، ئەوانیش هاوکارییەکانیان لەهێزەکانی ئەمریکاو هاوپەیمانان وەردەگرن. لەوبارەیەوە بەوتەی لیوا بەختیار بێت "یاداشنامەی لێکتێگەیشتن هەیە لەنێوان وەزارەتی پێشمەرگەو وەزارەتی بەرگری ئەمریکا (پنتاگۆن) لەسەر ئەو بەرنامەیە تاساڵی ٢٠٢٦ بەردەوام ئەبێت‌و بەرنامەیەکی دیکەش هەیە ئەویش پێشمەرگە لەئایندەدا ٢٦ تا ٢٨ پرۆژە لەخۆی دەگرێت.

"ئێمە کەسمان دانەمەزراندووە جگە لەوانەی کەچونەتە کۆلێژی سەربازی، ئەویش ژمارەیەکی کەمە لەمەدەنی وەرگیراون، لای ئێمە دامەزراندن نییەو کەسیش دانەمەزراوە. سەبارەت بەژمارەشمان وازی لێبێنە لەسەربازیدا هەرگیز پرسیاری ژمارە مەکە". وتەبێژی هێزی ٧٠ وا دەڵێت.

هاوکات ئەمینداری گشتی وەزارەتی پێشمەرگەش دەڵێت "وەزارەتی پیشمەرگە لەساڵی ٢٠١٢وە دامەزراندنی نییە، تەنیا لەهێزەکانی ٧٠و٨٠ەوە دەگواسترێتەوە بۆسەر وەزارەت".

لایخۆشیەوە هادی ئەکرەم، بەڕێوەبەرى جێبەجێکار لەبەڕێوەبەرایەتى خانەنشینی پێشمەرگەى سلێمانى رایدەگەیەنێت "زانیاری وردت بدەمێ لەسەر بابەتی خانەنشینی هێزەکانی ٧٠، بەکتابی ژمارە ١١/٩٧٩ بەرواری ٢٢ی تەمموزی ٢٠٢٤ فەرمانی وەزاری لەوەزارەتی پێشمەرگە بۆ دەرچووە بەگواستنەوەی دۆسیەو مووچەی ١٣ هەزارو ٦٢٠ خانەنشینی کەمئەندام لەبەڕێوەبەرایەتی خانەنشینی فەرماندەی هێزەکانی ٧٠ بۆ سەر میلاکی وەزارەتیان، بەڕێوبەرایەتی خانەنشینان تەمویلەکەیان ١٠ ملیارو ٤٩٢ ملیۆن‌و ٦٤٣ هەزارە. ئەمانە هەمووی دەبێت جارێکی دیکە مووچەکانیان بێتەوە سەر وەزارەتی دارایی ئەمەش کاتی دەوێت".

جبەخانەی هێزەکانی پێشمەرگەو وەزارەت، "لاوازن"

لیوا محمەد سابر هەمەوەندی، شارەزای بواری سەربازی نهێنیەک لەبارەی بودجەی تەرخانکراو بۆ جبەخانەکانی هێزەکانی ٧٠و٨٠ ئاشکرادەکات‌و دەڵێت "یەکێتی‌و پارتی بۆ هێزە تایبەتەکانیان زیاتر لە٤٠٠ ملیۆن دۆلاری دەوێت، بۆیە تەمویلی مووچەی کوردستان بەس بۆ هێزی سەربازییە، هێشتا بەرگریان زۆر بەهێز نییە وەکو درۆن‌و مەدفەعییە، جبەخانەکانیشیان لەدەرەوە دەکڕن چونکە تاوەکو ئێستا نەیانتوانیوە کارگەیەکی جبەخانە دروستبکەن یان جلوبەرگ‌و مەخزەن، هیچ درۆنێکیان نییەو هەمووی دەکڕن".

سەبارەت بەوەی ئایا وڵاتان هاوکاری جبەخانەکانی هەرێم دەکەن؟ هەمەوەندی وتی "نەخێر، بەڵام زیاتر چەکمان روسییە، ئەو وڵاتەش فیشەکێک بەکەس نادات تاوەکو پارەکەی پێشەکی نەدەیتێ، هەرێم چەک دەکڕێت لەوڵاتەکانی بولغاریاو رۆمانیاو کڵاشینکۆف‌و هاوەن‌و مەدفەعیەیە لەگەڵ دەبابەش لەروس، بۆ ئەمەش هەردوو حزب ساڵانە دەبێت ٤٠٠ بۆ ٥٠٠ ملیۆن دۆلار بدەن، چونکە ٤٠٠ هەزار پێشمەرگەیان هەیە، ژمارەیان لەبەرگری عێراق زۆرترە کە ٣٠٠ هەزارە، تاوەکو ئێستا هەرێم لەدایکبووی چلەکانی خانەنشین نەکردووە، نازانن چۆن بیکەن".

لەبەرامبەردا لیوا ئەحمەد لەتیف، وتەبێژی هێزی ٧٠ی پێشمەرگەش ئاماژە بەوە دەکات کە ٧٠و٨٠ هیچ هاوکارییەکی هاوپەیمانان وەرناگرێت، "جگە لەهەندێک مەسک، چونکە ئەو هاوکارییە تەنیا بۆ لیواکانی وەزارەتی پێشمەرگەیە، بەڵام لەسەر ئەوەش پەکناکەوێت، بەڵام پشتیوانی هاوپەیمانان چ لەرووی مەشقەوە چەکدارکردنەییەوە یان چەکی مۆدێرن‌و پێداویستی سەربازی لەجل‌وبەرگ بۆ ئێمە زۆر گرنگە، دەبێت حکومەتی هەرێمیش لەجاران زیاتر بیر لەپێداویستییەکانی هێزی پێشمەرگەو مووچەیان‌و ساڵانی خزمەتیان‌و خانەنشینکردنیان بکاتەوە".

لای خۆشییەوە لیوا بەختیار محەمەد، ئەمینداری گشتی وەزارەتی پێشمەرگە باس لەوەدەکات، کە "هاوپەیمانان هیچ مەرجێکیان نییەو هاوکارییەکانیش بەردەوامن، هاوکاری ئەمریکا هەیە لەگەڵ مەکتەبی نوسینگەی هەماهەنگی ئاسایشی، ئیدارەی نوێی ئەمریکا لەماوەی سێ مانگدا پێداچوونەوەو هەڵسەنگاندن دەکات بۆ هاوکارییەکانی کە دەدرێتە دەرەوەی وڵاتی خۆیان، ئێمەش دیارە بەشێکین وەکو عێراق‌، دوای هەڵسەنگاندنەکە دەزانین چەندێک لەهاوکارییەکان بەردەوام دەبێت".

ئاوێنە پڕۆژەیەکی میدیایی بەهاوبەشی لەگەڵ "قریب" بەڕێوەدەبات