فڕۆکەیەکی نەفەرهەڵگر و هێلیکۆپتەرێکی سەربازی ئەمڕۆ لە فڕۆکەخانەیەکی ئەمریکا خۆیان بەیەکدیدا کێشا. سیناتۆرێکی ئەمریکی لە کانساسەوە دەڵێت، فڕۆکەیەکی نەفەرهەڵگر بە نزیکەی 60 سەرنشینەوە لە ئاسماندا خۆی بە هێلیکۆپتەرێکی سەربازیدا جۆری بلاک هۆکدا کێشاوە.
سیناتۆری کۆمارییەکان. رۆجەر مارشاڵ لە تۆڕی کۆمەڵایەتیی ئێکس نووسیویەتی "فڕۆکەیەک کە لە ویچیتای ویلایەتی کانساسەوە بەرەو واشنتۆن دەهات و نزیکەی 60 سەرنشینی هەڵگرتبوو، لەگەڵ هێلیکۆپتەرێکی سەربازی پێکیاندا داوە". لە نوسینەکەیدا نوسیویەتی: ئەمەی روویداوە "کابووس"ـە.
ئاژانسی هەواڵیی فرانس پرێس لە زاری بەرپرسێکی سوپای ئەمریکاوە بڵاوی کردووەتەوە، سێ سەربازی سوپای ئەمریکا لەو هەلیکۆپتەرە سەربازییەدا بوون کە لەسەر رووباری پۆتۆماک لە واشنتۆن لەگەڵ فڕۆکەیەکی بازرگانیی کۆمپانیای پی ئێس ئەی ئەیرلاینز لە جۆری بۆمباردیێر پێکیاندا دا.
لە پاش بڵاوبوونەوەی هەواڵەکە، دۆناڵد ترەمپ، سەرۆکی ئەمریکا رایگەیاند، لە رووداوەکە ئاگادار کراوەتەوە.
ئەمێریکان ئەیرلاینز رایگەیاند، 60 گەشتیار و چوار ئەندامی تیمی فڕۆکەوانی لەناو ئەو فڕۆکە بازرگانییەدا بوون، کە دوای پێکدادان لەگەڵ هەلیکۆپتەرێکی سەربازی لە ئاسمانی واشنتن کەوتە ناو رووباری پۆتۆماک.
بەگوێرەی زانیارییەکان هێلیکۆپتەرە سەربازییەکە خۆی بە فڕۆکەکەدا کێشاوە، لەکاتێکدا فڕۆکەکە ویستوویەتی لە فڕۆکەخانەی رۆناڵد ریگن لە واشنتن بنیشێتەوە.
هێلیکۆپتەرەکە لە جۆری بلاک هۆک سیکۆرسکی ئێچ -60ـە، فڕۆکەکەش لە ویچیتای ویلایەتی کانساسەوە دەهات.
هاوکات، هەتا ئێستا زیانە گیانییەکان نەزانراون و تیمەکان سەرقاڵی گەڕانن بەدوای سەرنشینەکاندا.