بریكاری وەزارەتی پێشمەرگە رەتیدەكاتەوە پلان هەبێت بۆ ئەوەی فەرماندەییەكانی زێرەڤانی و بەرگری و فریاكەوتن بخرێنە سەر وەزارەكەیان و پێشبینیش دەكات پڕۆسەی یەكخستنەوەی هێزەكانی پێشمەرگە بەر لەو وادەیە تەواو ببێت كە دیاریكراوە.

ئاوێنە: عەبدولخالق باپیری، بریکاری وەزارەتی پێشمەرگە، ئەمڕۆ پێنجشەممە لە کۆنگرەیەکی ڕۆژنامەوانیدا ڕایگەیاند: پڕۆسەی یەکخستنەوەی ھێزەکانی پێشمەرگە بەخێرایی بەڕێوەدەچێت، تا مانگی سێی ئەمساڵ ھێزەکانی 70 و 80  دەخرێنە سەر وەزارەتی پێشمەرگە و تاکو ئێستاش شەش فرقە ڕێکخراونەتەوە.

بریکاری وەزارەتی پێشمەرگە وتیشی، بە گوێرەی نەخشەی ھاوپەیمانان تا ساڵی 2026 پێویستە ھێزەكانی پێشمەرگە یەک بخرێنەوە، پێشبینی دەکەین لەو وادەیە زوتر پڕۆسەکە تەواو بێت.

عەبدولخالق بابیری وتیشی: تاکو ئێستا ھیچ بڕیارێک نییە کە ھێزی زێرەڤانی بخرێنە سەر وەزارەتی پێشمەرگە، چونکە کاری ئەوان جیاوازە و سەر بە وەزارەتی ناوخۆن.

ڕاشیگەیاند: ھاوکاری ھاوپەیمانان بەردەوامە و تا ئێستا ھیچ بڕیارێکمان دەربارەی ڕاگرتنی ھاوکاریی ھاوپەیمانان بۆ پێشمەرگە بەدەست نەگەیشتوە.