فواد حسێن، وەزیری دەرەوەی عێراق رەتیدەكاتەوە هیچ هەڕەشەیەك لە عێراق كرابێت لەلایەن ئیدارەی ترەمپ، سەرۆكی ئەمریكاوە.
ئاوێنە: فواد حسێن، ئەمڕۆ دوشەممە، لەمیانی پانێڵێكدا لە بەغدا وتی، "هیچ هەڕەشەیەكمان لەلایەن ئیدارەی نوێی ئەمریكاوە بەرامبەر بە عێراق نەبیستوە."
وەزیری دەرەوەی عێراق لە بەشێكی دیكەی قسەكانیدا وتی، ئاسایشی عێراق گرێدراوە بە ئاسایشی ناوچەكەو بەپێچەوانەشەوە.
جەختیشی كردەوە كە پەیوەندیی عێراق لەگەڵ وڵاتانی رۆژئاوایی پەیوەندییەكی بەهێزو عێراق پەیوەندیی مێژویی لەگەڵ بەریتانیا هەیە و رێككەوتنەكانی ئەم دواییەی عێراق لەگەڵ ئەو وڵاتە سەرجەم بوارەكان و پتەوكردنی پەیوەندییەكان لەخۆدەگرێت.
هێمای بۆ ئەوەش كرد كە گەڕی پێنجەمی گفتوگۆی ستراتیژیی نێوان عێراق و ئەمریكا، فراوان دەبێت و ژمارەیەكی زۆر لیژنە لەخۆدەگرێت.
لەبارەی پەیوەندییەكانی عێراق لەگەڵ چین، فواد حسێن وتی، ئاڵوگۆڕی بازرگانی لەگەڵ ئەو وڵاتە گەیشتۆتە 50 ملیار دۆلار.