ئەو خانەنشینانەی لە ساڵی 2003 بۆ 2014 خانەنشین كراون و خزمەتییان كەمكراوەتەوە، مووچە و خزمەتیان راست دەكرێتەوە، بەرپرسێكی یەكێتیی خانەنشینانیش ئاشکرای دەکات، راستكردنەوەكە لە 1ی7ی2024وە بۆیان هەژمار دەكرێت و مووچە و خزمەتیشیان زیاد دەبێت و جیاوازیی مووچەشیان بۆ خەرج دەكرێت.

ئاوێنە: ئیسماعیل موخڵیس، جێگری سەرۆكی لقی هەولێری یەكێتیی خانەنشینان رایگەیاند، فەرمانگەی خانەنشینی ئاگاداریان كردینەوە، ئەو خانەنشینانەی، كە لە كاتی هاوتاكردنی مووچەكانیاندا مووچەیان كەمكراوەتەوە، بەتایبەت ئەوانەی خزمەتیان لەسەرووی 45 ساڵ بووە و كەمكراوەتەوە بۆ 35 ساڵ، ئەوانە خزمەتەكانیان چاكدەكرێتەوە.

هەر خانەنشینێك ئەو كێشەی هەیە، دەبێت بەپەلە سەردانی فەرمانگەی خانەنشینی بكات و كێشەكەی چارەسەر دەكرێت.

ئیسماعیل موخڵیس روونی كردەوە، ئەوانەی ئەو كێشەیان هەیە، دەبێت ناسنامەیان بۆ فەرمانگەی خانەنشینیی هەولێر ببەن، وتیشی: ئەوانە ناویان دەنووسرێت و خزمەتەكەیان بۆ راست دەكرێتەوە و مووچەشیان زیاد دەبێت.

ئیسماعیل موخڵیس ئاشکراشی کرد، ئەو خانەنشینانەی ئەو كێشەیان هەیە، ژمارەیان هەزاران خانەنشینە.