بە فەرمانی مەسرور بارزانی، سەرۆكی حكومەتی هەرێم و پاڵپشت بە یاسای خانەنشینیی یەكگرتوی عێراق، تەمەنی خانەنشینی لە هەرێمی كوردستان بۆ 60 ساڵ كەمكرایەوە. ئەوەش لەكاتێكدایە كە عێراق هەوڵی ئەوە دەدات تەمەنی خانەنشینی لە 60 ساڵەوە بكاتەوە بە 63 ساڵ.

ئاوێنە: بەپێی فەرمانێكی مەسرور بارزانی، سەرۆكی حكومەتی هەرێم، كە ئەمڕۆ چوارشەممە، دەرچوە، پاڵپشت بە یاسای خانەنشینی یەكگرتوی عێراق، تەمەنی خانەنشینی سەرجەم فەرمانبەران لە هەرێمی كوردستان دەكرێتە 60 ساڵ و هەر فەرمانبەرێك تەمەنی 60 ساڵی تەواو كرد، پێویستە دەستبەجێ هەواڵەی خانەنشینی بكرێت.

فەرمانەكەی مەسرور بارزانی لەكاتێكدایە كە لە ئێستادا پێشنیارە یاسایەك بۆ هەمواركردنەوەی یاسای خانەنشینی یەكگرتوی عێراق لە پەرلەمانی عێراقەو تێیدا پێشنیار كراوە تەمەنی خانەنشینبونی فەرمانبەران لە کەرتی گشتی بکرێتەوە بە 63 ساڵ کە لە ئێستاداو بەهۆی هەمواری یەکەمی یاساکە لە ساڵی 2019 کراوەتە 60 ساڵ.

لە بەشێكی دیكەی فەرمانەكەی مەسرور بارزانیدا هاتوە، سەبارەت بە خانەنشینكردن لە سەر داوای فەرمانبەر، هەر فەرمانبەرێك بەتەواوكردنی 45 ساڵ تەمەن و بونی 15 ساڵ خزمەت، فەرمانی خانەنشینكردنی دەرچوبێت بەر لە دەرچونی بڕیاری ئەنجومەنی وەزیرانی هەرێم لە 3/7/2024، پێویستە مامەڵەی خانەنشینییەكەی رایی بكرێت، بەڵام لەدوای رێككەوتنی ئەو بڕیارەوە، حوكمەكانی یاسای خانەنشینی یەكگرتوی عێراق پیادەدەكرێن كە پێویستە فەرمانبەرەكە تەمەنی 50 ساڵی تەواو كردبێت یان راژەی خانەنشینییەكەی لە 25 ساڵ كەمتر نەبێت.