لە ئاهەنگی شەوی سەری ساڵدا لەتەواوی ناوچەکانی عێراق نزیکەی 600 کەس بریندار بوون.
ئەمڕۆ 1ی 1ی 2025، سەیف بەدر وتەبێژی وەزارەتی تەندروستی عێراق ڕاگەیاند،، لە ئاهەنگەکانی شەوی سەری ساڵ لە پارێزگا و ناوچەکانی عێراق بەهۆی هەڵدانی یارییە ئاگرینەکانەوە 143 کەس بریندار بوون و زۆرینەی بریندارەکانیش لە بەغدادی پایتەخت بوون، هەندێک لە بریندارەکانیش دۆخی تەندروستیان خراپە و لە چاودێری چڕ چارەسەر وەردەگرن.
هەروەها وتیشی: هەر لە شەوی سەری ساڵدا 40 هاووڵاتی بەهۆی تەقەکردنی هاووڵاتیانەوە بریندار بوون و 203 کەسی دیکەش بەهۆی رووداوی هاتووچۆوە بریندار بوون، 178 کەسی دیکەش بەهۆی رووداوی جۆراوجۆرەوە بریندار بوون.
وتەبێژی تەندروستی عێراق ئاماژەی بەوەشدا، هیچ حاڵەتێکی گیانلەدەستدان تۆمار نەکراوە و ئەو بریندارانەشی دۆخی تەندروستیان ناجێگیرە بەردەوام چارەسەریان بۆ دەکرێت.