ئەمڕۆ دادگای فیدراڵی لەبارەی سكاڵایەك لەسەر گرانی نرخی نەوتی سپی لە هەرێمی كوردستان كۆبوویەوە، سكاڵاكە لەلایەن دەیان هاوڵاتی هەرێمەوە لەسەر وەزیری نەوت و سەرۆكوەزیرانی عێراق تۆماركرابوو، دادگا لە كۆبوونەوەكەی ئەمڕۆدا بڕیاری ڕەتكردنەوەی سكاڵاكەیدا.
ئاوێنە: بە پێی خشتەی دادگای فیدراڵی عێراق ئەمڕۆ دادگاكە سەبارەت بە چەند دۆسییەك كۆبوویەوە، كە یەكێكیان پەیوەندی بە هەرێمی كوردستانەوە بوو.
بە پێی خشتەكە، ئەمڕۆ دادگای فیدراڵی یەكەم دانیشتنی لەبارەی سكاڵایەك لەسەر گرانی نرخی نەوتی سپی لە هەرێمی كوردستان ئەنجامدا، كە سكاڵاكە لەلایەن ١٠٢ هاوڵاتی هەرێمەوە تۆماركرا بوو.
هاوكات، لە كۆبوونەوەكەی ئەمڕۆدا بەهۆی پەیوەندیدار نەبوونیان بە دۆسییەكەوە، دادگای فیدراڵی بڕیاری ڕەتكردنەوەی سكاڵاكەیدا.
سكاڵاكە لەسەر ناڕەوایی ڕێكارەكانی وەزارەتی نەوت و ڕەزامەندیی سەرۆك وەزیرانی عێراق لەسەر دیاریكردنی نرخی نەوتی سپی بە هاوڵاتییانی هەرێمی كوردستان تۆماركرا بوو.
بە پێی بڕیارەكەی وەزارەتی نەوت، نرخی هەر لیترێك نەوت بۆ هاوڵاتییانی هەرێمی كوردستان بە ٥٠٠ دینار دیاریكراوە، بەڵام لە شارەكانی عێراق ١٥٠ دینارە، بەوەش نرخی یەك بەرمیل نەوت لە عێراقدا بە ٣٠ هەزار دینار دابەش دەكرێت، بەڵام لە هەرێمی كوردستاندا ١٠٠ هەزار دینارە.