یانەی نەسری سعودی رایگه‌یاند، کریستیانۆ ڕۆناڵدۆ ئەستێرەی پورتوگالی سه‌ردانی به‌غدا ناكات به‌مه‌به‌ستی به‌شداریكردنی له یاری یانه‌كه‌ی به‌رامبه‌ر به شورته كه له یاریگای مه‌دینه له رۆژهه‌ڵاتی شاری به‌غدا به‌ڕێوه‌ده‌چێت.
ئاوێنه: یانەی نەسری سعودی ئەمڕۆ یەکشەممە له راگه‌یه‌ندراوێكدا باسی له‌وه‌كردوه، کریستیانۆ ڕۆناڵدۆ ئەستێرەی پورتوگالی به‌هۆی توشبونی به په‌تای وه‌رزی ناتوانێت سه‌ردانی به‌غدا بكات به‌مه‌به‌ستی به‌شداریكردن له یاری یانه‌كه‌ی به‌رامبه‌ر به شورته كه بڕیاره سبه‌ی دوشه‌ممه له یاریگای مه‌دینه به‌ڕێوه‌بچێت.
ئاماژه‌ی به‌وه‌شكردوه، هیواداربون كه کریستیانۆ ڕۆناڵدۆ بتوانێت له‌گه‌ڵ یاریزانانی یانه‌كه‌ی گه‌شت بكات بۆ به‌غدا بۆ روبه‌ڕوبونه‌وه‌ی یانه‌ی شورته له خولی ئاسیا، به‌ڵام توشبونی به په‌تای وه‌رزی رێگری لێده‌كات.
یانەی نەسر دوپاتیکردوەته‌وە کە ڕۆناڵدۆ بەدەست کێشەیەکی تەندروستییەوە دەناڵێنێت، کە ڕێگری دەکات لە گەشتکردن، بەوەش کۆتایی بە هیوای ملیۆنان عێراقی دێت کە بە پەرۆش بون بۆ هاتنی ڕۆناڵدۆ تاوه‌كو له نزیكه‌وه له یاریگایه‌كی به‌غدا ببینرێت.