میدیا عێراقییەکان بڵاویان کردەوە، شاندێکى باڵیۆزخانەی ئەمریكا لە بەغدا كۆبوونەوەیان لەگەڵ شەش كەسایەتی سیاسی ئەنجامداوە و لە ڕێگەى ئەوانەوە پەیامیان بۆ تاران ناردووە کە هێرش نەکاتە سەر ئیسرائیل، دەشڵێن، لە كۆبوونەوەكاندا سێ خاڵ باس كرابوو، كە بریتین لە مەترسی پەرەسەندن كێشەكان و شەڕی هەمەلایەنە و لێكەوتەكانی لەسەر ناوچەكە.
ئاوێنه: میدیا عێراقییەكان لە زاری سەرچاوەیەكەوە سەبارەت بە كۆبوونەوەى شاندێکى باڵیۆزخانەی ئەمریكا لە بەغدا لەگەڵ چەند كەسایەتییەكی سیاسی عێراق، زانیاری نوێ دەخەنەڕوو ڕایگەیاند، لە ماوەی هەفتەی ڕابردوودا باڵیۆزخانەی ئەمریكا لە بەغدا كۆبوونەوەی بەرفراوانی لەگەڵ شەش كەسایەتی سیاسی عێراق ئەنجامداوە، کە بەشێكیان سوننەن، کۆبونەوەکەش بە بەمەبەستی گەیاندنی پەیام بووە بە تاران سەبارەت بە وەڵامدانەوەی تەلئەبیب لە دوای كوشتنی هەنیە.
ئاماژەی بەوەشكردووە، بەرپرسانى باڵیۆزخانەکە لە كۆبوونەوەكانیان سێ خاڵیان گەیاندە لایەنەكان، كە بریتین لە مەترسی پەرەسەندنی كێشەكان و شەڕی هەمەلایەنە و لێكەوتەكانی لەسەر ناوچەكە، هاوكات ئەمریكا هەنگاو دەنێت بۆ یارمەتیدانی كەمكردنەوەی گرژییەكان لە ڕۆژهەڵاتی ناوەڕاست، بەتایبەتی شەڕی غەزە.
هاوکات، ئێوارەی دووشەممەی ڕابردوو ئەمریكا لە ڕێگەی ئوردنەوە پەیامێكی ئاڕاستەى بە تاران كرد، كە چەند بڕگەیەكی لەخۆگرتبوو، دیارترینیان ئەگەری زیندووكردنەوەی ڕێككەوتنی ئەتۆمی و چاوپۆشیكردن لە هەندێك سزای ئابووری.
جێگای ئاماژەیە، بەرەبەیانی ٣١ـی تەمموزی ئەمساڵ ئیسماعیل هەنیە بەرپرسی مەكتەبی سیاسی حەماس لە هێرشێكی ئاسمانیدا خۆی و پاسەوانێكی لە تارانی پایتەختی ئێران كوژران، دواتر ئێران گرووپە چەكدارەكانی ئیسرائیلیان تۆمەتبار كرد، بۆیە لەو كاتەوە تا ئێستا پیلان دادەڕێژن بۆ ئەوەی هێرش بكەنە سەر ئیسرائیل.