ئا: ئاوێنە

مێژوویەکی تر، گفتوگۆیەکی کراوەی ئازاد تۆفیق-ە لەگەڵ فوئاد مەجید میسری، کتێبێکی قەبارە گەورەی ٤٦٦ لاپەڕەییە، کە نوسەری دیاری کورد "فوئاد مەجید میسری" لەپاڵ گێڕانەوەی سەردەمی منداڵی لەکانێسکانی شاری سلیمانییەوە، شرۆڤەی مێژووی شاری سلێمانی‌ لەسەردەمی بابانەکانەوە تا دەگات بەهاتنی ئینگلیزەکان‌و دەسەڵاتی شێخ مەحمودو پاشان چۆنیەتی دامەزرانی حوکمی پاشایەتی لەعێراق‌ دەکات‌و دواتریش قۆناغی دوای شۆڕشی  ١٤ی تەموز تا ئێستا دەگێڕێتەوەو بۆچوونی خۆی سەبارەت  بەرووداوو کەسایەتییەکان‌ دەردەبڕێت.

بەشێکی سەرنجڕاکێشی ئەم گفتوگۆیە گێڕانەوەی چۆنیەتی سەرهەڵدانی باڵی جەلالی‌و قسەکردنە دەربارەی پەیوەندییەکانی باڵی مەکتەبی سیاسی ئەو سەردەمەی پارتی لەگەڵ ساواکی ئێران‌و قسەکردنی راشکاوانەی ئەم نووسەرەیە دەربارەی کەسایەتی ئیبراهیم ئەحمەد‌و جەلال تاڵەبانی‌و کاژیک‌و تاقمی کانی ماسی‌و نەشیروان مستەفاو کۆمەڵەو ئارام‌و شێرکۆ بێکەس.

ئاوێنە گرنگترین خاڵەکانی ئەم قسەو باسانە سەبارەت بەو رووداوو کەسایەتییانە دەخاتەڕوو کە لەشەستەکانی سەدەی رابردوەوە تا ئێستا تیا ژیاوە یاخود لەنزیکەوە ناسیونی.

 "جەلالییەکان هەڵەیەکی مێژوویی کوشندەو گەورەیان کرد"

فوئادی مەجید میسری لەم گفتوگۆیەدا ئاماژە بەوە دەکات عیسا پەژمان کە کاراکتەرێکی دەستڕۆشتووی ساواک بووە، کاتێک لەلایەن رژێمی شاوە نێردراوە بۆ عێراق، یەکەمجار پەیوەندی بەو سەرکردانەی پارتییەوە کردووە کە دواتر بوونەتە کاراکتەری سەرەکی باڵی مەکتەبی سیاسی‌و هانیداون بۆ بەرپاکردنی شۆڕشی ئەیلول‌و "تووشی خۆشخەیاڵی کردون"!

باس لەوە دەکات کە خاڵی تەقینەوەی ئەم ناکۆکییانەی نێوان بارزانی‌و مەکتەبی سیاسی، دوای رێککەوتنامەی موشیر – بارزانی بوو کە وەک فوئاد خۆی دەڵێت "دەقی رێککەوتننامەی موشیر - بارزانی  کە دواتر باڵی مەکتەبی سیاسی لەدژی وەستایەوە من نوسیومە لەساڵی ١٩٦٤دا"، کە ئەوکات خوێندکاری ئامادەیی‌و حیمایەی "ئیبراهیم ئەحمەد" بووە.

فوئاد دەڵێت "فاکتەری سەرەکی ئەم رێککەوتنە تۆڵەسەندنەوە بوو لەمەکتەبی سیاسی کە – پێشتر - ژێر بەژێر رێککەوتنیان لەگەڵ حیزبی بەعسدا ئەنجامدابوو.. بارزانی ئەم رێککەوتنەی کرد بۆ ئەوەی گوشاری سوپای عێراق لەسەر بادینان کەمبکاتەوەو ناکۆکییەکانی لەگەڵ مەکتەبی سیاسی یەکلایی بکاتەوەو جڵەوی بزوتنەوەکە بەتەواوی بگرێتە دەست‌و مەکتەبی سیاسی پەراوێز بخات‌و سەرکردایەتییەکی نوێ بەو شێوەیەی خۆی ئەیەوێ لەجێی دابنێ‌و بەکردەوەش ئەنجامی داو کلیلی شەرو ئاشتی لەکوردستاندا کەوتە دەست خۆی".

فوئاد ئاماژە بەوە دەکات کە شەڕو ململانێی مەکتەبی سایسی‌و پارتی لەسەر دەسەڵات‌و بڕیار بوو، ئەو دەڵێت "بەڕای من ئەبوو مەکتەبی سیاسی ئەو دۆخە نەگەیەنێتە شەڕو لەگەڵ بارزانی جۆرێک سازانیان بکردایە، من بۆ خۆم لەو کاتەدا لەبەرئەوەی حیمایەی برایم ئەحمەد بووم لەنزیکەوە ئاگاداری زۆربەی کۆبوونەوەکانی مەکتەبی سیاسی بووم لەعیساوێ‌و ئاوکورتێ... پرسیاری مێژوویی ئەوەیە ئایا ئەو دەستەبژێرە رۆشنبیرەی کە ناوی مەکتەبی سیاسی بوو ئاستی لێکدانەوەو تێگەیشتنیان ئەوەندە نەبوو هەست بەم مەترسییە گەورەیە بکەن؟! ئایا نەدەکرا دەستبەرداری پۆستی حیزبی بن‌و پلەو پایە ببن‌و جڵەوی مەسەلەکە بدەنە دەست بارزانی‌و ئاکامەکانی بەجێبهێڵن بۆ حوکمی مێژوو؟".

دەشڵێت "برایم ئەحمەدو سەید عەزیز شەمزینی‌و عومەر دەبابە بێ پرس‌و رەزامەندی بارزانی سەفەری ئەوروپایان کرد بوو، کۆمەک‌و یارمەتی داراییان بۆ بزوتنەوەی کورد وەرگرتبوو، لای ئەو ئاشکرایان نەکردووە"، ئەمەش هێندەی تر بارزانی تووڕە کردووە.

فوئاد دەڵێت "تۆ ئێستا کە دەگەڕێیتەوە بۆ ئەو قۆناغە تێدەگەی مەکتەبی سیاسی خوێندنەوەیەکی دروستیان بۆ وەزعەکە نەبووە، گرتنی کۆنفرانسی ماوەت‌ بەو پەلە پەل‌و سڕ کردنی بارزانی بڕیارێکی سەرپێی‌و هەڵەیەکی گەورەی مێژوویی بووە. نەئەبوو ئەندامانی مەکتەبی سیاسی خۆیان تووشی خۆشخەیاڵی بکەن‌و پێیانوابێ بەو هەنگاوە بارزانی ئەخەنە دەرەوەی رووداوەکان‌و گۆشەگیری ئەکەن. بۆیە سەرەنجام ئەم بڕیارە بووە ئەو پریشکەی ئاگری لەتەڕو وشک بەردا... ئەوەی روویدا هەڵەیەکی مێژوویی کوشندە بوو. نەخۆیان‌و نەهیچ کەس بۆیان راستناکرێتەوەو هەزار پەشیمانیش قەرەبووی لافاوی خوێنی بەناهەق رژاوی سەدان کوڕی کورد ناکاتەوە کە تا رۆژگاری ئەمڕۆش لرفەی دێ... هەرچی کارەساتیش لەکوردستاندا روویداوە لەو رۆژەوە تا ئێستا بەرهەمی ئەو کۆنفرانسەیە... هەموو بۆچوونەکانیان سەبارەت بەتاک مانەوەی بارزانیش هەڵە دەرچوون... ئەگەر بابەتیانەش تەماشای دۆخەکە بکەین ئەبێ ئەو پرسیارە لەخۆمان بکەین چ لۆژیکێک ئەوە قەبووڵ ئەکا لەگەرمەی شەڕی کوردو دەوڵەتی عێراقدا کەلێنێکی گەورە بخەیتە ناو بزوتنەوەکەوە؟ ئەبوو بیانزانیایە گرەو لەسەر دوورخستنەوەی بارزانی خەونێکە بۆیان نایەتە دی!! سەڕەرای ئەمانە هەمووی کە جیابوونەوەو دووبەرەکی روویدا دەرکەوت لەسەر زەمینەی واقیع ٥٠٠ کەس زیاتریان لەدەور نەماو ٩٥%ی پێشمەرگەی کوردستان بەهێزەکانی بارزانییەوە پەیوەست بوون، ئەمە بەڵگەی چییە؟".

فوئاد ئەوە رووندەکاتەوە کە هاوینی ١٩٦٤ مانگێک بەر لەهێرشەکەی بارزانی بۆ سەر مەکتەبی سیاسی‌و دەرپەڕاندنیان لەماوەت، ئیبراهیم ئەحمەد سەردانێکی کورت‌و بەپەلەی کردووە بۆ گوندی شیهابەدین کە نوێنەری مەکتەبی سیاسی ئەورەحمانە رووتەی لێ نیشتەجێ بووە، لەوێ پیاوێکی بیانی بینیوە - کە دواتر دەردەکەوێت نوێنەری ساواکی ئێرانە -  چەند کاتژمێرێک لەگەڵ برایم ئەحمەد گفتوگۆ ئەکەن‌و چەند رۆژێک بەدوای ئەوەدا ژمارەیەک تفەنگی بڕنەو بۆ مەکتەبی سیاسی دێت‌. فوئاد دەڵێت "خۆیشم تفەنگێکم لەو بڕنەوانە وەرگرت کە لەو کاتەدا نیشانەی ئەوە بوو شەڕ لەنێوانی باڵی مەکتەبی سیاسی‌و بارزانی بەڕێوەیە".

بەپێی گێرانەوەی فوئاد "هەفتەیەک بەر لەهەڵگیرسانی شەڕەکە، برایم ئەحمەد کە سکرتێری مەکتەبی سیاسی بووە لەگەڵ خێزان‌و مناڵەکانی‌و عەباس ناوێک کە نوێنەری ساواکی ئێرانی بووە لەمەکتەبی سیاسی‌و لەگەڵ فوئادی مەجید میسری بە بەلەمێکی لاستیک لەچەمی تەیەت دەپەڕنەوەو دەچنە خاکی ئێرانەوەو لەگوندی بێژوێ جێگیر دەبن".

 لەوەڵامی ئەوەشدا کە مام جەلال لەکتێبی لەدیداری تەمەن-دا وتویەتی هێزەکەی مەکتەبی سیاسی بەبێ ئاگاداری دەوڵەتی ئێران چوونەتە ناو خاکی ئێرانەوە، فوئاد دەڵێت "تۆ پێتوایە هێزێکی ٥٠٠ نەفەری بەڕۆژی رووناک‌و بەچەک‌و تفاقی شەڕەوە هەروا بەئاسانی بتوانێ خۆی بەئێراندا بکاو کەس ئاگای لێنەبێ‌و دوایی دەوڵەتی ئێرانی پێی بزانێ؟! ئاخر ئەمە چ عەقڵێک قەبوولی ئەکا؟‌! ئەی بەر لەپەڕینەوەی هێزەکە بەچەند ڕۆژ سکرتێری مەکتەبی سیاسی‌و خێزانی‌و ئەفسەرە پلە باڵاکەی ساواک کە بەعەباس بێتەل ناسرابوو هاوڕێمان نەبوو کە لەچەمی تەیەت پەڕینەوەو چووینە گوندی بێژوێ؟ ئەی بەر لەو مێژووە بەمانگێک تفەنگە بڕنەوەکان لەئێرانەوە نەگەیشت‌و بەسەر پێشمەرگەدا دابەش نەکران؟!".

"پیاوکوژەکانی کانی ماسی، کاژیک بوون"

بەشێکی دیکەی سەرنجڕاکێشی ئەم گفتوگۆیە قسەکردنە دەربارەی ئەو کوشت‌و بڕەی، وەک فوئاد دەڵێت "لەلایەن کاژیکەکانەوە بەرامبەر بەشیوعییەکان لەکانی ماسی کراوە".

فوئاد دەڵێت "کاژیک رێخستنێک بوو لەنیسانی ١٩٥٩ دامەزرا، دامەزرێنەرانی بریتی بوون لەئەحمەد هەردی، جەمال نەبەز، عەبدوڵا جەوهەر، فەرەیدون عەلی ئەمین، فایەق عارف، ئیحسان فوئاد. گوتاری فیکری‌و سیاسی کاژیک وەک لەمانیفێستەکەیدا دیارە هەمان گوتاری عەرەبە نەتەوەییەکانە، بەڵام بە بەرگێکی کوردی.. لەمانگی ١٩٦٤دا دەستەیەکی تر کە ئەوانیش خۆیان بەنەتەوەیی ئەزانی‌و دیارترینیان شێخ محەمەدی هەرسین‌و حەمەی عەزیز بوون‌و ناوی خۆیان نابوو پارتی گەلی کورد لەگەڵ کاژیک یەکیانگرت. کاتێکیش ناکۆکی نێوان بارزانی‌و مەکتەبی سیاسی تەقییەوەو کەرتبوون دروستبوو، هەوادارانی کاژیک بوونە لایەنگری باڵی بارزانی‌و بەکردەوە لەئۆرگانەکانیدا رۆڵی بەرچاویان گێڕا، وەک حەمەی هەرسین‌و فەتاح ئاغاو حەمەی عەزیز...".

دەشلێت "هێڵی فیکریی کاژیک بێجگە لەدوژمنایەتی کردنی مارکسیزم شتێکی تر نەبوو. کاژیک ناوەکەی کورتکراوەی (کۆمەڵی ئازادی‌و ژیانەوەو یەکێتی کورد)ە، خوازراوی یاخود وەرگێڕدراوی (حزب البعث العربي) ە، لەپراکتیزیشدا هەمان رێبازی ئەو حزبەیان پەیڕەو کرد کە دوژمنایەتی مارکسیزم‌و قەتل‌و عامی خەڵکی کۆمۆنیست بوو... هەوادارانی کاژیک دەبنە ئەندامی پێشمەرگەی ناو شارو بارەگا لەگوندی کانی ماسی نزیک شاری سلێمانی دادەمەزرێنن".

فوئاد باس لەوە دەکات کە ١٢ رۆژ لەکانی ماسی گیراوەو لێکۆڵینەوەی لەگەڵ کراوە، ئاماژە بەڕووداوێکی هەژێنەریش دەکات لەکانی ماسی بەچاوی خۆی بینیویەتی کە پێشمەرگەکانی کانی ماسی بەخۆشی‌و پێکەنینەوە نەوتیان کردووە بەسەرو پۆتەڵاکی بەندکراوێکی شیوعیدا دەستی لەدواوە بەستراوەو پاشان ئاگریان تێبەرداوەو هەر هاوارو هەڵبەزینی بووە تا بووە بەکڵۆیەک خەڵوز"و دەڵێت "ئەوە دیمەنێکە مەحاڵە هەتا لەژیاندا بم لەبەرچاوم ون ببێ".

"مام جەلال کۆمەڵە ئەکاتە پردێک بەسەریدا ئەپەڕێتەوە بۆ بەدیهێنانی ئامانجەکانی خۆی"

فوئاد باس لەوە دەکات کە لەسەرەتای حەفتاکانی سەدەی رابردوودا بووە بەکۆمەڵە، بەڵام دەڵێت "ئەو کاتەی پەیوەندیم بەکۆمەڵەوە کرد ژمارەیەک ئاڵای سووریان بۆ هێنام بیخوێنمەوە راستییەکەی هیچ بابەتێکی سەرنجی رانەکێشام... من پێموایە کۆمەڵە لەڕووی فیکری و تیۆرییەوە دامەزراو نەبوو،  من بەش بەحاڵی خۆم یەک وشە لەناو کۆمەڵەدا فێر نەبووم. ئەوەی ئەمزانی بەهەوڵی خۆم فێری بووم".

دەشلێت "پوختەی بیروڕام لەمەڕ دروستکردنی یەکیتی‌و دواڕۆژی کۆمەڵە ئەوە بوو کە مام جەلال کۆمەڵە ئەکاتە پردێک بەسەریدا ئەپەڕێتەوە بۆ بەدیهێنانی ئامانجەکانی خۆی... مام جەلال حزبێک دروست ئەکا لەوجۆرەی خۆی ئەیەوێ، هەر ئەوەندەش هێزێک لەدوای خۆیەوە بینی، هەوڵی پاکتاوکردنی نەیارەکانی ئەداو دەست ناپارێزێ‌و یەکەم قوربانیش کۆمەڵە ئەبێ. بەتایبەت دوای نەمانی شیهاب دەستی کراوەتر ئەبێ سکرتێری نوێ بۆ کۆمەڵە کاندید بکاو نەوشیروانیش ئەو کەسە ئەبێ‌و کۆنترۆڵی هەموو بزوتنەوەکە ئەکا... خاڵێکی تریش کە من پێداگریم لەسەر ئەکرد هەڵوێستی دەوڵەتی سوریا بوو کە لەو کاتەدا ناکۆکییەکانی لەگەڵ عێراق رۆژ لەدوای ڕۆژ قوڵتر ئەبونەوەو رۆڵی سەرەکی هەبوو لەدروستکردنی یەکیتیدا. سوریاش دەوڵەتیکە وەک ئێران بەرژەوەندی لەوەدا نییە کورد بەمافی خۆی بگا. سوریا هەمان حزب و ئایدۆلۆژیا بەڕیوەی دەبات کە لەعێراقە. سوریا خاوەنی بیرۆکەی پشتێنەی سەوزە  کە لەسەرەتای شەستەکانی سەدەی رابردوودا رۆژئاوای پێ تەعریب کرد... سوریا رۆڵی هەبوو بزوتنەوەیەکی چەکداری لەکوردستاندا دروست بکا بۆ دژایەتی عێراق... زۆر بەئاشکرا بەئارامم وت: من ئامادە نیم شان بدەمە بەر شتێک پێشەکی بزانم سەرەنجامەکەی چییە..... ئینجا وتم: هاوڕێ گیان من لەدوای شکستی ١٩٧٥ەوە باوەڕم بەهیچ سەرکردەیەکی تەقلیدی کورد نەماوەو ئامادەش نیم بچمە پای هیچ کارێک ئەوانە سەرکردەو رابەری بن".

"نەوشیروان مستەفا ئەیویست تیرۆرم بکات"

فوئاد مەجید میسری سەبارەت بەهەوڵی کوشتنی دەڵێت "هەوڵەکان راستەو هیچ گومانی تیا نییەو تەنانەت لەم ساڵانەشدا دەقی ئەو نامەو فەرمانانەش بڵاوکرانەوە کە بۆ تیرۆر کردنی چەندین کەس دەرچووبوون‌و منیش یەکێکیان بووم... وەک هەلوێستێکی ئەخلاقیش لەسەرمە نەیشارمەوە یەکەمجار دلێری سەید مەجید نامەیەکی بەدەستی دایکیدا بۆ ناردم‌و ئاگاداری کردمەوە کە هەوڵێکی وا هەیەو ئاگاداری خۆم بم". 

دەشلێت "دوای تیرۆر کردنی عەبدولی سۆران‌و نوری حەمە عەلی‌و کاردانەوەی لەناو جەماوەری شاری سلێمانیدا هەواڵ ئەگاتە سەرکردایەتی (ی.ن.ک) وەک مامۆستا جەعفەر ئەیگێڕێتەوە، خۆی ئەچیتە لای مام جەلال‌و لەناڕەزایەتییەکانی ناو شار ئاگاداری ئەکاتەوە. دوای تاوتوێکردنی مەسەلەکە. لەسەر ئەوە پێکدێن کە مامۆستا جەعفەر بەیاننامەیەک بنووسێ‌و تێیدا ئەو کارە تیرۆریستییە بخاتە ئەستۆی دامودەزگا هەواڵگرییەکانی رژێم‌و بێئاگایی ی.ن.ک روونبکاتەوە. دەم‌و دەست بەیاننامە ئەنووسرێ‌و لەئێستگەوە زۆر بەتوندی ئیدانەی رژێم ئەکرێ کە بەمەبەستی تێکدانی ریزەکانی گەل ئەمجۆرە کارو کردەوانە ئەنجام ئەدا! لەکاتی خوێندنەوەی بەیاننامەکەدا وریا لەگوندی قزلەر ئەبێ. ناوەڕۆکی بەیاننامەکەش باس لەبێتاوانیی‌و نیشتیمانپەروەریی تیرۆرکراوان ئەکا. وریا کە لەو ساتەدا لەگەڵ دەستەیەک هاوەڵ‌و برادەریدا دانیشتووە بەم هەواڵە زۆر تیکئەچێ‌و ئەڵێ: هەوالگری رژێمی چی؟! خەڵکی بێتاوان‌و نیشتیمانپەروەرمان پێ ئەکوژن‌و دوایش ئەیخەنە ئەستۆی رژێم؟! باشبوو فوئادی مەجید میسریشم نەکوشت...؟!)...

فوئاد جەخت لەوە دەکات "ئەوەی کە بەناحەق وریای بەکوشت دا جوامێری و ئازایەتی خۆی بوو کە رووبەڕوو بەنەوشیروان ئەڵێ: تۆ بەغەرەزی شەخسی خەڵک ئەکوژی!!".

فوئاد ئاماژە بەوەش دەکات کە "چەند جاری تر لەدوای کوشتنی وریاو تەنانەت دوای راپەڕینیش هەوڵی کوشتنی دراوە".

باس لەوەش دەکات کە تەنانەت برایمی حەمە خورشە کە زۆر برادەری مام جەلال بووەو جەلالی بوونیش شەفاعەتی بۆ ناکات لەو شەپۆلی تیرۆر کردنە رزگاری بێت کە لەهەشتاکانی سەدەی رابردوودا بەرامبەر چەندین کەسایەتی شاری سلێمانی ئەنجام دراو ئەمیش بەناحەق ئەکوژرێ، فوئاد دەڵێت "برایم بۆ کوژرا؟! وەڵامی ئەم پرسیارە ئەبێ ئەو کەسانە بیدەنەوە کە دەستیان چووەتە خوێنی سەدان کەسی بێتاوان... من بۆ خۆم ئەو پرسیارەم لەمام جەلال کرد: بۆچی برایم کوژرا؟! لەهاوینی ١٩٩٥ کە رۆژێک مام جەلال لەگەڵ مولازم عومەرو هێرۆو عومەری سەید عەلی‌و عومەر فەتاح‌و مەلا یاسین سەردانی خێزان‌و مناڵەکانی برایمی کرد... من پرسیم: مام جەلال برایم بۆ کوژرا؟ مام جەلال سوێندی خوارد کە ئەو لەو کاتەدا لەکوردستان نەبوەو بێئاگایە، وتیشی ئەو کردەوەیە یەکێکە لەشتە خراپەکان کە یەکێتی نیشتیمانی کردویەتی!".

فوئاد لەو دانیشتنەدا بەمام جەلال ئەڵێ "ئەمانە خێزان‌و مناڵەکانیین هەموو گەورەن ئەیانەوێ جوابێکیان پێبێ بۆ خەڵک‌و مێژوو. وتی: ئەمن ئەو جوابە دەدەمەوە.. وتم: چۆن مام جەلال؟ وتی: بەیاننامە دەردەکەم‌و لەکوردستانی نوێ بڵاوی دەکەمەوە... من ئیدی قسەم نەکردو کۆتایی بەمیواندارییەکە هات... من بەمناڵەکانم وت: گومانم هەیە بەیاننامە دەربکا. وتیان: چۆن؟ وتم: بۆ مردوو، زیندوو زویر ناکا. سەرەنجام - بەڵێنەکەی مام جەلال – قسەیەک بوو لەهەوادا توایەوە!".

"شێرکۆ بێکەس داوای ئەکرد بمکوژن"

لەبەشێکی دیکەی ئەم گفتوگۆیەدا، فوئاد مەجید میسری، شێرکۆ بێکەس بەوە تۆمەتبار دەکات کە داوای لەنەوشیروان مستەفا کردووە "بە(سزای گەل‌و شۆڕش) بگەیەنرێم"، فوئاد لەبارەی شێرکۆ بێکەسەوە دەڵێت "شاعیرێک لەدوای شێخ رەزاوە دەستپێشخەر بووە لەداهێنانی شیعری جنێودا، دەستپێشخەر بووە لەقوڵکردنەوەی ناکۆکییە سیاسییەکان‌و خۆشکردنی ئاگری شەڕی کورد کوشتندا... شێرکۆ وەستای شیعرە، بەڵام وەستایی شەفاعەت بۆ هەڵوێست‌و ئەو دەستەواژانە ناکا کە بەشیعر دەریبڕیون‌و لەمێژووی ئەدەبیاتی کوردیدا ئەبێ قسەو باسی زۆریان لەبارەوە بکرێ... شێرکۆ تەنها ئەو کەسە بەگیانبەختکردوو ئەزانێ کە سەر بەحزبەکەی خۆیەتی. شێرکۆ بەگەرمی هانی حزبەکەی خۆی ئەدا، لایەنی بەرامبەر پاکتاو بکا. بەشیعر بەنزین ئەکا بەسەر ئاگری شەڕی ناوخۆدا. شەڕێک کارەساتێکی وەهای لەدوای خۆی بەجێهێشتووە تا سەد ساڵی تر ئاسەواری ئەمینێ‌و میللەت باجەکەی ئەدا".

شێرکۆ بەوەش تۆمەتبار دەکات کە شیعری لەخانەی داهێنان بردوەتە دەرو کردویەتی بەبابەتی خۆشگوزەرانی‌و خۆ دەوڵەمەندکردن. پاشان چەند نمونەیەکی سەیر لەشێوەی هەڵسوکەوتی شێرکۆ دەگێڕێتەوەو دەڵێت "ساڵی ١٩٧٨، محەمەد فەریق حەسەن کۆمەڵە چیرۆکێکی بەناونیشانی (سێبەری ئەسپەشێ) چاپ و بڵاوکردەوە. من لەژمارە ٦٧ ساڵی ١٩٧٨ی گۆڤاری رۆشنبیری نوێ-دا بابەتێکی رەخنەییم لەبارەوە بڵاوکردەوە. لەژمارە ٦٩ی هەمان گۆڤاردا بابەتێک بڵاوبۆوە بەناوی (محەمەد غەفور قەرەداخی) کە وەڵامی نوسینەکەم بوو... نوسەری ئەم بابەتە (شێرکۆ بێکەس)ە، بەڵام بەناوی برایەکی محەمەد فەریق!... ئەمە چ مۆرالێکە لەپەنای ناوی برای نووسەر بابەت بنووسی‌و بڵاویبکەیتەوەو دوای دوو هەفتەیش بچیت پاداشتی نووسینەکەت لەئیدارەی گۆڤارەکە وەربگریت؟! بەلایشمەوە زۆر سەیر نەبوو چونکە لەبواری نووسین‌و بڵاوکردنەوەدا شێرکۆ شتی تری لەو بابەتەی زۆرە. کە شانۆیی (ئاسک)ی بڵاوکردەوەو کەس هیچی لەسەر نەنووسی، خۆی دەستی دایە قەڵەم وتارێکی بەناوی (نەوزاد ئەحمەد)ەوە بەناونیشانی (قەڵەمبازێک لەشانۆی کوردیدا) لەهەفتەنامەی هاوکاری بڵاوکردەوەو دوایی چوو پاداشتەکەی وەرگرت!!".

هاوکات باس لەوەش دەکات کە حەمەی حەمە باقی شاعیر راپۆرتی لەسەر نوسیوەو بەگرتی داوە، فوئاد دەڵێت "لەتۆڵەی نووسینێکی رەخنەیی دەربارەی شیعرەکانی حەمەی حەمە باقی جارێک لای پاراستن ساڵی ١٩٧٤ بەگرتی دام، ئەم ڕقەشی خاو نەبۆوە لەساڵی ١٩٨٢ کە ئەوکات چوبووە ناو یەکێتی نیشتیمانییەوە، لەبۆنەیەکدا بەنەوشیروان مستەفا ئەڵێ: بیستومە ئەتانەوێت فوئاد بکوژن. بەرای من مەیکوژن تێزاب بەدەم و چاویدا بکەن!! ... شێرکۆیش بەهاوکاری برادەرانی چەند جار ئەم فەتوایەی داوەو بەڕەی خستۆتە مزگەوتەوە. هەر بۆ نمونە بڕوانە ئەو نامە جوانەی لەسلێمانییەوە ناردویەتی بۆ حەمەی حەمە باقی‌و داوای لێ ئەکا نامەکە نیشانی نەوشیروان مستەفا بدا تا بەسزای رەوای خۆمان بگەیەنن!".  

دەشڵێت "من هەرگیز شتی وام بەخەیاڵدا نەدەهات چونکە لەو باوەڕەدا نەبووم کەسێک خۆی بەنووسەرو شاعیر بزانێ هەڵوێستی لەوجۆرە بنوێنێ! هەموو ئەو کارو کردەوانەی شێرکۆو هاوەڵانی لەبەرامبەر من نواندیان‌و گەیاندیانە داوای کوشتن، لەسەر چەند بابەتێکی رەخنەیی بوو. لەکوێی دنیادا دیاردەی وا قێزەونت بینیوەو بیستووە شاعیری بەناو هەست ناسک داوا بکا (تێزاب) بەدەموچاوی رەخنەگردا بکرێ، یەکێکی تر بەڕەوای بزانێ لەژیاندا نەمێنم‌و هەرچی زووە بە(سزای گەل و شۆڕش)م بگەیەنن!!".