ئەنجومەنی وەزیرانی ئابوریی عێراق، لە كۆبونەوەی ئەمڕۆی خۆیدا، بڕیاریدا كۆبونەوەیەكی تایبەتی ئەنجومەنەكە لە هەرێم ئەنجام بدرێت بۆ چارەسەركردنی سەرجەم كێشە ئابورییە هەڵپەسێردراوەكانی نێوان بەغداو هەولێر.
ئاوێنە: بەپێی راگەیەندراوێكی نوسینگەی راگەیاندنی ئەنجومەنەكە، ئەمڕۆ دوشەممە، ئەنجومەنی وەزیرانی ئابوریی عێراق، بە سەرۆكایەتی فواد حسێن، جێگری سەرۆك وەزیران و وەزیری دەرەوەی عێراق كۆبوەتەوە كە تێیدا هەریەكە لە وەزیرانی پلاندانان، دارایی، كشتوكاڵ، پیشەسازی، و كارو كاروباری كۆمەڵایەتی و هەروەها ئەمینداری گشتی ئەنجومەنی وەزیران، پارێزگاری بانكی ناوەندی، راوێژكارانی یاسایی و ئابوریی سەرۆك وەزیران و بریكاری وەزارەتی نەوت ئامادە بون.
بەپێی راگەیەندراوەكە لە كۆبونەوەكەدا چەند بڕیارێك دراون كە یەكێك لە بڕیارەكان بریتییە لە ئەنجامدانی كۆبونەوەیەكی تایبەتی ئەنجومەنەكە لە هەرێمی كوردستان ئەوەش لەپێناو "چارەسەركردنی سەرجەم كێشە ئابورییە هەڵپەسێردراوەكان بە بەشداری سەرجەم دامەزراوە ئابورییەكان لە حكومەتی فیدراڵ و حكومەتی هەرێم."
هەر بەپێی راگەیەندراوەكە، لە كۆبونەوەكەدا ستراتیژیی نیشتمانیی بۆ قەرز پەسەندكراوە.