لەپەرەسەندنێکی نوێی ڕووداوەکاندا، ڕۆژنامەیەکی ئیسرائیلی بڵاویکردۆتەوە، ئێران هۆشدارییداوەتە حزبوڵڵای لوبنانی، بەوەی ئەگەری هەیە ئیسرائیل هەوڵی تیرۆرکردنی حەسەن نەسروڵڵا بدات.
ڕۆژنامەی یەدیعوت ئەحرۆنۆتی عیبری لەراپۆرتێکدا بڵاویکردۆتەوە، ڕاستەوخۆ دوای تیرۆرکردنی تاڵیب سامی عەبدوڵڵا سەرۆکی یەکەی ناسری حزبوڵڵا لەباشووری لوبنان، نێردراوێکی ئێرانی گەیشتۆتە بەیروت‌و لەژوورێکی داخراودا لەگەڵ کەسانی نزیک لە حەسەن نەسروڵڵا کۆبووەتەوە تا لەنیگەرانییەکانی ئێران ئاگاداریان بکاتەوە کە ئیسرائیل خودی نەسروڵڵا دەکاتە ئامانج.
یەدیعوت ئەحرۆنۆت ئاماژەی بەوەشکردووە، "پێدەچێت مۆساد لەهەموو کاتێکدا شوێنی وردی نەسروڵڵا بزانێت، تەنانەت ئەگەر شوێنەکانیشی بگۆڕێت، تەنانەت نەسروڵڵا خۆی دەزانێت کە ئیسرائیل دەتوانێت دەستی پێبگات بەڵام ئەوە دەشارێتەوە".
سەرەڕای توندبوونەوەی ئاسایشی دەوروبەری نەسروڵڵا، یۆسی کۆهین سەرۆکی پێشووی مۆساد لەمدواییانەدا وتی:"ئێمە شوێنی وردی ئەمینداری گشتیی ڕێکخراوە تیرۆریستییەکە دەزانین‌و دەتوانین لەهەر ساتێکدابێت لەناوی بەرین".
ئاماژەی بەوەشکرد، ئەگەر بڕیارێک بدرێت بۆ حەق و حیساب دەرکردن لەگەڵ نەسروڵڵا، ئەوە ئیسرائیل دەتوانێت لە هەر کاتێکدا ئەوکارە بکات.
بەردەوامی بەئامانجکردنی سەرکردەکانی حیزبوڵڵای لوبنان لەلایەن ئیسرائیلەوە کە زیاتر لە 300 کەس دەبێت، پرسیاری لەبارەی ئامانجە ستراتیژییەکەیەوە دروستکردووە، بەتایبەتی لەگەڵ ئەو ئامادەکاریانەی کە بەرپرسانی ئیسرائیل سەبارەت بە ناوچەی سنووری باکووری وڵاتەکەیان ڕایانگەیاندووە.