پاسەوانی كەناراوەكانی ئیتاڵیا رایگەیاند لە ئەنجامی تێکشکانی دو بەلەمی پڕ لە کۆچبەر لە نزیک کەناراوەکانی باشوری وڵات، 10 کۆچبەر خنکاون و 60ـی دیکەش بێسەروشوێنن.

ئاوێنە: پاسەوانی كەناراوەكانی ئیتاڵیا، ئەمڕۆ دوشەممە، رایگەیاند، بەلەمێکی کۆچبەران، کە 61 کۆچبەری لەسەر بوە، لە نزیک کەناراوەکانی دورگەی لامپەدوسا لە باشوری ئیتاڵیا تێکشکاوە، توانیویانە 51 لەو کۆچبەرانە رزگار بکەن و 10 کۆچبەریش خنکاون.

 لەلایەکی دیکەوە پاسەوانی دەریایی ئیتاڵیا بەیانیی ئەمڕۆ رایگەیاند، سەرقاڵی گەڕانن بەدوای کۆچبەراندا دوای ئەوەی بەلەمێکی دار، کە 72 کۆچبەری تێدابوە، لەنزیک نیمچەدورگەی کالابریا لە باشوری ئیتاڵیا تێکشکاوە و، بەگوێرەی زانیارییەکانیان 60 کۆچبەر بێسەروشوێنن. 

 پاسەوانی كەناراوەكانی ئیتاڵیا راشیگەیاند، پرۆسەی گەڕان بەدوای کۆچبەرەکاندا لە شەوی یەکشەممەوە دەستیپێکردوە و تائێستاش بەردەوامە، و توانیویانە 12 کۆچبەر لە خنکان رزگار بکەن. ئاماژەشیان بەوەکردوە، بەلەمەکە لە تورکیاوە بەڕێکەوتوە. 

ئاماژەی بەوەشداوە کەشتییەکی فەرەنسی ئاگاداری کردونەتەوە کە بەلەمێکی پڕ لە کۆچبەر ژێرئاو کەوتوە، تاوەکو گەیشتونەتە لای بەلەمەکە، نیوەی بەلەمەکە ژێرئاو کەتوە. 

پۆلیسی ئیتاڵی رایگەیاندوە 12 کۆچبەرە رزگاربوەکەیان گەیاندوەتە شارۆچکەی رۆچێلا لۆنیکا لە باشوری ئیتاڵیا. 

بەوتەی بەرپرسانی ئیتاڵی، زۆربەی ئەو کۆچبەرانەی لە بەلەمی دوەمدا ژێرئاو کەوتون، خەڵکی ئێران و ئەفغانستان بون.