ترەیسی جاكۆبسن، كاندیدی سەرۆكی ئەمریكا بۆ وەرگرتنی پۆستی باڵیۆزی ئەو وڵاتە لە عێراق رایگەیاند، ئێران رۆڵێكی "ناشیرین و خراپ" لە عێراق دەگێڕێت و دەشڵێت، میلیشیاكانی هاوپەیمانی ئێران هەڕەشەی گەورەن بۆ سەر سەقامگیری عێراق و هەمو رێگایەكی سیاسی بەكاردەهێنێت بۆ روبەڕوبونەوەی ئەو هەڕەشەیەو لە قاڵبدانی هەژمونی ئێران.
ئاوێنە: ترەیسی جاكۆبسن، كاندیدی سەرۆكی ئەمریكا بۆ پۆستی باڵیۆزی ویلایەتە یەكگرتوەكان لە عێراق لەبەردەم لیژنەی پەیوەندییەكانی دەرەوەی ئەنجومەنی پیرانی ئەمریكا وتەیەكی پێشكەشكردو سوپاسی جۆ بایدن، سەرۆكی ئەمریكای كرد بۆ متمانەپێدانی لە كاندیدكردنی بۆ پۆستی باڵیۆزی ئەمریكا لە عێراق.
جاكۆبسن لە وتەكەیدا وتی، ئەگەر لەو پێگەیە دەستبەكارببێت، ئەلەویەتی كارەكانی پاراستنی هاوڵاتیانی ئەمریكاو پتەوكردنی هاوبەشیی دوقوڵی دەبێت، بۆ پشتیوانیكردنی ستراتیجەكانی ئەمریكا و بەرژەوەندییە هاوبەشەكان.
لەبارەی ئاسایش و سەقامگیری عێراقیشەوە، ئاماژەی بەوەكرد، رێكخراوی داعش هێشتا هەڕەشەیە لەسەر ناوچەكەو سوپاكەیان پشتیوانییەكی گرنگ پێشكەش بەهێزە ئەمنییەكانی عێراق و پێشمەرگە دەكات لە هەرێمی كوردستان.
ئەوەشی خستەڕو، دوای (10)ساڵ لە گەڕاندنەوەی هێزەكانمان بۆ عێراق بۆ روبەڕوبونەوەی داعش, كاتی ئەوە هاتووە سوپاكەمان رۆڵێكی نوێی هەبێت.
ئاماژەی بەوەشدا، سودانی هەنگاوی ئەرێنی ناوە لەڕوی بەهێزكردنی پەیوەندییەكانی عێراق لەگەڵ وڵاتانی دراوسێدا.
هێمای بۆ ئەوەش كرد، بونی گەشەی ئابوری و حكومەتێك توانای پێشكەشەكردنی خزمەتگوزاری هەبێت بە گەلەكەی، توانای تیرۆر لاوازدەكات و هەژمونی میلیشیا هاوپەیمانەكانی ئێرانیش كەمدەكاتەوە كە هەڕشەیەكی گەورەن لەسەر ئایندەی وڵات.
ئاماژەی بەوەشدا، ئێران رۆلێكی خراپ و ناشیرین دەگێڕێت لە عێراق و سەقامگیری ناوچەكە تێكدەدات، هەڕەشەی گەورە لەسەر عێراق، میلیشیا هاوپەیمانەكانی ئێرانن و بەهەمو میكانیزمێكی سیاسی بەردەست هەوڵی روبەڕوبونەوەی ئەو هەڕەشەیەو لەقاڵبدانی هەژمونی ئێران دەدەن.
لە بەشێكی دیكەی قسەكانیدا وتی، پشتیوانی رێوشوێنەكانی خەزێنەی ئەمریكا دەكەن بۆ نوێكردنەوەی سیستمی بانكیی عێراق و,رێگە بە ئێران نادەن غازی كارپێكردنی وێستگەكانی كارەبا وەك چەك دژی عێراق بەكاربهێنێت.