بەرەبەیانی ئەمڕۆ بەمەبەستی بەشداریی لە 50مین لووتکەی وڵاتانی گروپی حەوت، جۆو بایدن گەیشتە ئیتاڵیا.
پێشبینی دەکرێت تەوەری سەرەکی لووتکەی ئەمجارەی گروپی حەوت شەڕی ئۆکرانیا و هاوکاریی کیێڤ، هاوکات هەوڵەکان بۆ هێنانەکایەی ئاگربەست لە نێوان حەماس و ئیسرائیل بێت.
وابڕیارە لە پەراوێزی لووتکەی گروپی حەوت، جۆ بایدن گرێبەستێکی ئەمنی بۆ ناردنی پاکێجێ نوێی سەربازی بۆ ئۆکرانیا لەگەڵ ڤۆلۆدیمیر زێلێنسکی سەرۆکی ئەو وڵاتە مۆر بکات.
گروپی حەوت لە ئەمەریکا، ئیتاڵیا، کەنەدا، بەریتانیا، ژاپۆن، فەڕەنسا و ئەڵمانیا پێک دێت و ساڵانە سەرکردەی ئەم وڵاتانە بۆ تاوتوێکردنی پرسە گەرم و گرنگەکانی جیهان کۆدەبنەوە.
جۆن کیربی، ڕێکخەری پەیوەندییە ستراتیجییەکانی کۆشکی سپی ڕایگەیاند، بڕیارە گرووپی حەوت لە لووتکەی خۆیدا لە ئیتاڵیا سزای نوێ و سنووردارکردنی هەناردەکردنی ڕووسیا ڕابگەیەنێت.
لای خۆیەوە بەشێوەیەکی فەرمی بۆرسەی مۆسکۆی ڕووسیا سەرجەم کارەکانی بازرگانی بە دۆلاری ئەمەریکی و یۆرۆی ئەوروپی ڕادەگرێت.
هەروەها بۆرسەی مۆسکۆ پێش 13ـی تەمموز سەرجەم گرێبەستەکانی فۆرئێکس دادەخات کە بەرامبەر یۆرۆ و دۆلار و پاوەندە.