تەیف سامى وەزیرى دارایی عێراق رەتیدەکاتەوە رەزامەندى دابێت لەسەر بەستنى موچە بۆ بەشێکى تر لەدۆسیەى زیندانیانى رەفحا کە ژمارەیان نزیکەى دوو هەزار کەسە.

ئاوێنە: وەزارەتى دارایی عێراق رۆژى چوارشەممە لە رونکردنەوەیەکدا ئاماژەى بەوەکردووە، ئەو هەواڵانەى بڵاوکراونەتەوە لەبارەى رەزامەندى تەیف سامى وەزیرى دارایی لەسەر خەرجکردنى موچە بە ژمارەیەکى تر لە خەڵک لە دۆسیەى رەفحا دوورە لە راستییەوە.

جەختیشیکردووەتەوە، وەزارەتى دارایی پابەندە بە شەفافیەت لە راگەیاندنى بڕیارەکانى لەرێگەى کەناڵە فەرمییەکانییەوە.

ئەوە لەکاتێکدایە، پێشتر لەتۆڕە کۆمەڵایەتییەکان دەنگۆى رەزامەندى تەیف سامى بڵاوبووەوە لەسەر پێدانى موچە بە 1836 کەس کە لە ئەمەریکا و فەڕەنسا و کەنەدا لەدایکبوون لەژێر ناوى موچەى رەفحا.

دۆسیەى موچەى زیندانیانى رەفحا وەک دۆسیەیەکى جێگەى مشتومڕ لە عێراق ماوەتەوە، بەهۆى بەرزبوونەوەى بەردەوامى بڕە پارەى تەرخانکراو بۆ موچەکانیان، بەو پێیەى پێدانى موچە تەنانەت منداڵانى ئەو زیندانییانەش دەگرێتەوە کە لەکەمپى رەفحاى سعودیە ماونەتەوە لەکاتى جەنگى گەردەلولى بیابان لەلایەن هاوپەیمانانەوە دژى رژێمى سەدام حوسەین.

ژمارەى ئەو کەسانەى موچەى رەفحا وەردەگرن بە 30 هەزار کەس دەخەمڵێنرێن کە کۆى موچەکانیان دەگاتە 40 ملیار دینار و هەریەکەیان موچەکانیان لەنێوان ملیۆنێک و 200 هەزار دینار بۆ ملیۆنێک و 400 هەزار دیناردایە.

ساڵى 2020 و لەسەردەمى حکومەتى مستەفا کازمیدا، موچەى رەفحا رێکخرایەوە و بڕیاردرا موچەکە لەهەر خێزانێک تەنها بۆ یەک کەس خەرج بکرێت و ئەو کەسەى وەریدەگرێت دەبێت لە عێراق نیشتەجێ بێت.

کەمپی رەفحا لە ساڵی 1991، دوای راپەڕینی ناوەڕاست و باشووری عێراق لە پارێزگای رەفحا لە سعودیە، بۆ لەخۆگرتنى ئۆپۆزسیۆنى عێراق دروستکرا و دواى ساڵى 2003 داخرا، پێش داخستنى کەمپەکە زۆربەى دانیشتنوانەکەى رەوانەى رەوانەی ئوسترالیا، ئەمریکا و وڵاتانی ئەوروپا و ئێران کران.