پاش ئەوەی مارین لۆپێن سەرۆکی یەکێتی نەتەوەیی (RN) بەتۆمەتی خراپ بەکارهێنانی پارەی پەرلەمانی ئەورووپا دادگایی کراو سزای ٥ ساڵ دوور خستنەوەی لە سیاسەت و ٤ساڵ زیندانی بەسەردا سەپێندرا، وتی "ئەوانەی ناتوانن بەرگریم لێبکەن چۆن بەرگری لەنەیارەکەی ئەردۆغان دەکەن؟".
ئاوێنە: سیاسەتمەداری ڕاستڕەوی توندڕەو، لۆپێن لەکۆنگرەیەکی ڕۆژنامەوانیدا بڕیاری دادوەرەکانی فەرەنسای بە"سیاسی" ناوبردو ئەکرەم ئیمامئۆغلوی وەک نموونە هێنایەوەو حکومەتی فەرەنسای تۆمەتبار کرد بەجێبەجێکردنی دوو ستانداردو پێوەر، کە ماکرۆن نارەزایی بەرامبەر دەستگیرکردنی دەربڕیبوو، کاتێک ئیمامۆغلۆ بەتۆمەتی گەندەڵی لەتورکیا دەستگیرکراو ڕەوانەی زیندانی سیلیڤری کرا.
لۆپێن پرسیاری ئەوەی کرد "ئەوانەی ڕێگرییان لەپاڵێوراوی هەڵبژاردنی سەرۆکایەتی فەرەنسا کرد بۆ ئەوەی خۆی کاندید بکات، چۆن دەتوانن بەرگری لەڕکابەرە سەرەکییەکەی ئەردۆغان بکەن، کە ئێستا لەزیندان دەستبەسەرە؟".
دوای ئەوەی لۆپێن لەخۆکاندیدکردن بۆ پۆستی سەرۆک کۆماری قەدەغە کرا، پارتی یەکێتی نەتەوەیی فەرەنسا داوای کرد خەڵک بڕژێنە سەر شەقامەکان. لەکۆتایی ئەم هەفتەیەدا لەفەرەنسا خۆپیشاندان بۆ پشتیوانی لەمارین لۆپێن و دژی بڕیارەکەی دادگا بەڕێوەدەچێت.
لۆپێن وەک بەهێزترین کاندید بۆ هەڵبژاردنەکانی ٢٠٢٧ دەبینرا و دوای ئەم بڕیارە داهاتووی ڕاستڕەوی توندڕەو ناڕوونە.