وەزارەتی دەرەوەی توركیا رایگەیاند، ئەو لێدوانانەی وەزیرانی ئیسرائیلی لەدژی وڵاتەكەیان دەیدەن رەنگدانەوەی ئەو دۆخە دەرونییەیە كە تێیدا دەژین. دەشڵێت، ئیسرائیل بۆتە گەورەترین هەڕەشە بۆ سەر ئاسایشی ناوچەكە و برەو بە ئاژاوە و تیرۆر دەدات.
ئاوێنە: وەزارەتی دەرەوەی توركیا، ئەمشەو پێنجشەممە، لە راگەیەندراوێكدا وتی، لێدوانە ئیستیفزازییەكانی وەزیرانی ئیسرائیل بەرامبەر بە وڵاتەكەمان رەنگدانەوەی دۆخی دەرونی خۆیان و ئەو سیاسەتە دوژمنكارانەو پاوانخوازانەیەیە كە حكومەتی ئیسرائیل گرتویەتییە بەر.
ئاماژەی بەوەشداوە، هێرشەكانی شەوی رابردوی ئیسرائیل بۆ سەر چەند ناوچەیەكی سوریا، هیچ لێكدانەوەیەك هەڵناگرن جگە لەو سیاسەتە دەرەكییەی ئیسرائیل كە لەسەر ناكۆكی دەژی.
وەزارەتی دەرەوەی توركیا هێمای بۆ ئەوەش كردوە، وەزیرە ئیسرائیلییەكان ناتوانن لەپشت هێرشەكانیانەوە بۆ سەر سوریاو لوبنان و كردنە ئامانجی توركیا، "كۆمەڵكوژییەكانی غەززە، شەڕی گشتگیر لەدژی گەلی فەلەستین.. خواستەكانیان بۆ پاوانخوازی" بشارنەوە.
وەزارەتی دەرەوەی توركیا پێی وایە ئیسرائیل "بۆتە گەورەترین هەڕەشە" لەسەر ئاسایشی ناوچەكە و هەروەها ئیسرائیل وەك "فاكتەرێكی ناسەقامگیریی" لە ناوچەكەدا، دەبێتە هۆی برەودان بە "ئاژاوەو تیرۆر."
وەزارەتی دەرەوەی توركیا وتوشیەتی، پێویستە ئیسرائیل سەرەتا دەستبەرداری سیاسەتە پاوانخوازییەكانی ببێت و لە "خاكە داگیركراوەكان" بكشێتەوەو وازیش لە "لاوازكردنی ئەو هەوڵانە بهێنێت كە بۆ پتەوكردنی سەقامگیری لە سوریا" دەدرێن.
وەزارەتەكە وتوشیەتی، گرنگە كۆمەڵگەی نێودەوڵەتی بەرپرسیارێتی خۆی هەڵگرێت لە راگرتنی زیادبونی دەستدرێژییەكانی ئیسرائیل.
بەرلەوە گیدیۆن سائر، وەزیری دەرەوەی ئیسرائیل رایگەیاند، توركیا رۆڵێكی خراپ دەگێڕێت نەك هەر لە سوریا، بەڵكو لە لوبنان و ناوچەكەو چەند شوێنێكی دیكەی جیهانیش، هەروەها هەڵوێستێكی شەڕانگێزانەی بەرامبەر ئیدارەی خۆسەری كورد-رۆژاڤا لە باكوری سوریا هەیە.
هەروەها وتیشی، توركیا ئەوپەڕی هەوڵی خۆی دەدات بۆ ئەوەی سوربا بكاتە پاشكۆی خۆی، ئاشكرایە كە ئەمە مەبەستیەتی.
وەزیرە ئیسرائیلییەكە هێمای بۆ ئەوەش كرد، لەو باوەڕەدا نین كاتێك سوریا لەلایەن بریكارەكانی ئێرانەوە بەڕێوەدەبرا، شتێكی چاك بو، بەڵام لەگەڵ ئەوەش نین سوریا ببێتە پاشكۆی توركیا.