ئەمڕۆ پێنجشەممە، بە ئاڵوگۆڕكردنی نزیكەی 200 دیل، یەكەم بەندی ئەو رێككەوتنە جێبەجێكرا كە رۆژی 1ی ئەم مانگە لەنێوان ئیدارەی دیمەشق و ئەنجومەنی گەڕەكە كوردییەكانی حەڵەبدا ئیمزاكرا.

ئاوێنە: بەپێی میدیاكانی رۆژئاوای كوردستان، ئەمڕۆ پێنجشەممە، یەكەم بەندی رێككەوتنەكەی نێوان ئەنجومەنی گشتی گەڕەكەكانی شێخ مەقسود و ئەشرەفیەی حەڵەب جێبەجێكراوە.

ئەنجومەنی گشتی گەڕەكەكانی شێخ مەقسود و ئەشرەفیەی حەڵەب سەر بە هەسەدەن. ئەو بەندەی رێككەوتنەكە كە جێبەجێكراوە پەیوەندیداربوە بە ئاڵوگۆڕی دیلەكانی نێوان هەردولا.

ئەمڕۆ 146 دیلی سەربە هەسەدە و 97 دیلی سەر بە هێزەكانی دیمەشق، لەبەردەم فولكەی شێخان لە دەوروبەری گەڕەكی ئەشرەفیە، لەنێوان هەردولادا ئاڵوگۆڕكران.

رۆژی 1ی ئەم مانگە، رێككەوتنێك لەنێوان ئەنجومەنی گەڕەكەكانی شێخ مەقسود و ئەشرەفیەی حەڵەب كە سەربە هەسەدەیە لەلایەك و ئیدارەی دیمەشقدا ئیمزاكرا كە لە 14 بەند پێكدێت بە ئامانجی پتەوكردنی پێكەوە ژیان و پاراستنی دانیشتوان و نەهێشتنی دیاردەی چەكداری و چارەنوسی ئاسایش و نوێنەرایەتی گەڕەكە كوردییەكانی حەڵەب.

رێوڕەسمی ئاڵوگۆڕی دیلەكان بە ئامادەبونی ژمارەیەكی بەرچاو لە دانیشتوانی شاری حەڵەب بەڕێوەچو.

بەگوێرەی سەرچاوەكان لە ئەنجومەنی گشتی گەڕەكە كوردییەكانی حەڵەبەوە كە بۆ میدیاكانی رۆژئاوا قسەیان كردوە، ئەو ژمارە دیلەی كە ئەمڕۆ ئاڵوگۆڕ كراون، قۆناغی یەكەمی پڕۆسەكەیەو لە چەند رۆژی نزیكی داهاتوش، قۆناغی دوەمی ئاڵۆگۆڕی دیلەكان بەڕێوەدەچێت.