بڕیارە ئەمڕۆ هەینی بەندێكی دیكەی رێككەوتنی نێوان هەسەدەو ئیدارەی دیمەشق لەبارەی گەڕەكە كوردییەكانی حەڵەب جێبەجێ بكرێت كە بریتییە لە كشاندنەوەی هێزە سەربازییەكان لە هەردو گەڕەكە كوردییەكە بۆ ناوچەی رۆژهەڵاتی فوڕات.
ئاوێنە: بەپێی ئاژانسی هاوارنیوز، نزیك لە هەسەدە، بڕیارە ئەمڕۆ هەینی، بەندی شەشەمی ئەو رێككەوتنە جێبەجێ بكرێت كە لە رۆژی 1ی ئەم مانگە لەنێوان ئەنجومەنی گەڕەكەكانی شێخ مەقسود و ئەشرەفیەی حەڵەب كە سەربە هەسەدەیە لەلایەك و ئیدارەی دیمەشقدا لەلایەكی دیكە، ئیمزاكرا.
بەندی شەشەمی رێككەوتنەكە بریتییە لە كشاندنەوەی هێزە سەربازییەكان و چەكەكانیان لە هەردو گەڕەكە كوردییەكە بۆ ناوچەی رۆژهەڵاتی فوڕات.
ئەوەش لەكاتێكدایە كە دوێنێ پێنجشەممە، یەكەم بەندی رێككەوتنەكە جێبەجێكرا كە پەیوەندیداربو بە ئاڵوگۆڕی دیلەكان و تێیدا 146 دیلی سەربە هەسەدە و 97 دیلی سەر بە هێزەكانی دیمەشق، لەبەردەم فولكەی شێخان لە دەوروبەری گەڕەكی ئەشرەفیە، لەنێوان هەردولادا ئاڵوگۆڕكران.
رێككەوتنەكە لە 14 بەند پێكدێت بە ئامانجی پتەوكردنی پێكەوە ژیان و پاراستنی دانیشتوان و نەهێشتنی دیاردەی چەكداری و چارەنوسی ئاسایش و گەرەنتیكردنی نوێنەرایەتی گەڕەكە كوردییەكانی حەڵەب.