سه‌ربارى ڕاگه‌یاندنى ئاگربه‌ست له‌لایه‌ن پارتى كرێكارانى كوردستان (په‌كه‌كه‌)وه‌، به‌ڵام ته‌نها مانگى ڕابردوو توركیا 118جار هێرشیكردوه‌ته‌سه‌ر هه‌رێمى كوردستان‌و بۆردومانى چیاكانى كوردستانی كردوه‌، ڕێكخراوێكى ئه‌مریكیش ده‌ڵێت:"به‌راورد به‌دوو مانگى پێشوتر په‌لاماره‌كانى توركیا كه‌میانكردوه‌، به‌ڵام ژمارەی بۆردومانەکان بەراورد بەدواین هەفتەی پێش ڕاگەیاندنی بانگەوازەکە بەڕێژەی 145٪ زیادیکردوە".

ئاوێنە: ڕێكخراوى تیمی کوردستانی عێراقی CPT سەبارەت بەهێرش‌و بۆردومانەکانی سوپای تورکیا لەمانگی ئادارو به‌تایبه‌تیش لەدوای ڕاگەیاندنی ئاگربەستی تاکلایەنەی گەریلاکانی پارتی کرێکارانی کوردستان (په‌كه‌كه‌) ڕاپۆرتێكى بڵاوكردوه‌ته‌وه‌و ئاشكرایكردوه‌، "ته‌نها مانگى ڕابردوو سوپای تورکیا 118 هێرش‌و بۆردومانی بۆسەر هەرێمی کوردستان ئەنجامداوە".

ده‌شڵێت:"هەفتەی یەکەمی دوای ڕاگەیاندنی بانگەوازی ئاشتی ڕێبەری دەستگیرکراوی پەکەکە، ژمارەی بۆردومانەکان بەراورد بەدواین هەفتەی پێش ڕاگەیاندنی بانگەوازەکە بەڕێژەی 145٪ زیادیکردوە".

ئه‌وه‌ش له‌ڕاپۆرته‌كه‌دا هاتوه‌، "هێرشەکانی سوپای تورکیا لەمانگی ئاداردا، بەراورد بەمانگی کانونی دوەم، بەڕێژەی 12٪و  بەراورد بەمانگی شوبات، بەڕێژەی 21٪ کەمیکردوە".

له‌به‌شێكى دیكه‌ى ڕاپۆرتى ڕێكخراوى تیمی کوردستانی عێراقی CPT ئاماژه‌ به‌وه‌شكراوه‌، "لەمانگی ئاداردا، سوپای تورکیا 55 هێرشی بۆسەر سنوری پارێزگای هەولێرو 51 هێرشی بۆ سنوری دهۆک‌و 12 هێرشیشی بۆسەر سنوری پارێزگای سلێمانی ئەنجامداوە، هه‌ر لەمانگی ڕابردودا هیچ هێرشێک لەسنوری پارێزگای موسڵ ئەنجامنەدراوە".

جه‌ختیشده‌كاته‌وه‌، "هێرشەکانی سوپای تورکیا بۆسەر سنوری پارێزگای هەولێر لەمانگی ئاداردا، بەراورد بەمانگی شوبات 120٪ زیادیانکردوە، هاوكات سوپای تورکیا لەمانگی ڕابردودا، پێنج ئەشکەوتی سروشتی بەبەکارهێنانی تی ئێن تی تەقاندوه‌تەوە".

ڕێكخراوى تیمی کوردستانی عێراقی CPT  ده‌ڵێت:"لەسێ مانگی یەکەمی ئه‌مساڵدا، سوپای تورکیا 404 هێرش‌و بۆردومانی بۆسەر هەرێمی کوردستان ئەنجامداوەو بەو هۆیه‌شه‌وه‌ شه‌ش هاوڵاتی مەدەنی (2 شەهیدو 4 بریندار) بونەتە قوربانی".