وێڕای ئەوەی ئێران بەڕەسمی رایگەیاند، ئامادەیە بۆ دانوستانی ناڕاستەوخۆ لەگەڵ ئەمریكا، بەڵام دۆناڵد ترەمپ، سەرۆكی ئەمریكا دەڵێت، پێموایە ئێستا تاران دانوستانی راستەوخۆی دەوێت.
ئاوێنە: دۆناڵد ترەمپ، سەرۆكی ئەمریكا، شەوی رابردو لە لێدوانێكدا بۆ رۆژنامەنوسان، وتی، پێموایە باشترە دانوستانەكان لەگەڵ ئێران بەشێوەی راستەوخۆ ئەنجام بدرێن، ئەمە كارەكە خێراتر بەرەو پێش دەبات و زیاتر لە لایەنی بەرامبەر تێدەگەیت تا ئەوەی كە لەڕێگەی نێودەنگیرەكانەوە گفتوگۆ بكەیت.
وتیشی، ئێرانییەكان دانوستانیان لەڕێگەی لایەنی نێودەنگیرەوە دەویست، بەڵام پێموانییە ئێستا بەو شێوەیە بن.
ئەوەش لەكاتێكدایە كە پێشتر وەزیری دەرەوەی ئێران رایگەیاند، ئەوان لەژێر سایەی گوشارەكاندا دانوستانی راستەوخۆ لەگەڵ ئەمریكا ناكەن بەڵام دەكرێت دانوستانەكان بەشێوەی ناڕاستەوخۆ بەردەوام بن.
سەرەتاكانی مانگی رابردو ترەمپ نامەیەكی بۆ عەلی خامەنەیی، رێبەری كۆماری ئیسلامی ئێران نارد و تێیدا داوای دانوستان كرد بۆ گەیشتن بە رێككەوتنێكی نوێ لەبارەی بەرنامە ئەتۆمییەكەی ئێران، چەند هەفتەیەكیش دوای ئەوە ئێران بەنامەیەك وەڵامی نامەكەی ترەمپی دایەوە.
لەبارەی ناوەڕۆكی نامەكەی ئێرانەوە، شەوی رابردو، پرسیار لە ترەمپ كرا، ئەو لە وەڵامدا وتی "واز لە نامەكان بێنن. من پێموایە ئەوان(ئێرانییەكان) خوازیاری دانوستانی راستەوخۆن."
هەروەها وتیشی"پێموایە ئەوان(ئێرانییەكان) نیگەرانن و هەست بە لاوازی دەكەن، من نامەوێت هەستێكی لەو جۆرەیان هەبێت."