دۆناڵد ترەمپ، سەرۆكی ئەمریكا شەوی رابردو پێناسی نوێی گومرگی بەسەر زۆربەی وڵاتانی جیهاندا سەپاند، میدیای رەسمی روسیا دەڵێت، نەبونی روسیا لەنێو لیستی پێناسە گومرگییەكاندا بۆتە هۆی "نائومێدی وڵاتانی رۆژئاوا."

ئاوێنە: میدیا رەسمییەكانی روسیا هاوكات ئاماژەیان بەوەداوە كە وڵاتەكەیان بەهۆی ئەوەی پێشتر لەسەر شەڕی ئۆكرانیا، سزای بەسەردا سەپێندراوە، بۆیە لە لیستی پێناسە گومرگییە نوێكانی سەرۆكی ئەمریكادا نییە.

تەلەفزیۆنی روسیا24، كە كەناڵێكی رەسمی دەوڵەتی ئەو وڵاتەیە، وتویەتی، هیچ پێناسێكی گومرگی بەسەر روسیادا نەسپێندراوە، بەڵام ئەمە مامەڵەیەكی تایبەت نییە كە ئەمریكا لەگەڵ مۆسكۆ كردبێتی، بەڵكو تەنیا پەیوەندی بەوەوە هەیە كە پێشتر بەهۆی شەڕی ئۆكرانیاوە ئەمریكا سزای بەسەر روسیادا سەپاندوە.

هاوكات تەلەفزیۆنی روسیا1، وتویەتی، نەبونی روسیا لەنێو لیستی پێناسە گومرگییەكانی ئەمریكادا، "زۆرێك لە وڵاتانی رۆژئاوای نائومێدكردوە."

میدیاكانی سەربە كرملین بەشێوەیەكی تایبەت ئاماژەیان بە لێدوانەكانی وەزیری گەنجینەی ئەمریكا داوە كە بە فۆكس نیوزی وتوە"ئێمە بازرگانی لەگەڵ روسیا و بیلاڕوس ناكەین. ئەو دو وڵاتە سزا دراون."