محەمەد شیاع سودانی، سەرۆك وەزیرانی عێراق، ئەمڕۆ چوارشەممە، بەبۆنەی رۆژی شەهیدی فەیلیی عێراقی، پێشوازی لە ژمارەیەک کەسوکاری شەهیدانی کوردی فەیلی کرد و رایگەیاند، بەدواداچون بۆ پرسی دەركردنی رەگەزنامە بۆ كوردانی فەیلی دەكەین.

ئاوێنە: بەپێی راگەیەندراوێكی نوسینگەكەی، سەرۆک وەزیران محەمەد شەیاع سودانی، ئەمڕۆ چوارشەممە پێشوازی کرد لە کۆمەڵێک لە کەسوکاری شەهیدانی کوردە فەیلییەکان، بەبۆنەی ڕۆژی شەهیدانی فەیلی عێراقەوە.

سودانی لە دیداری لەگەڵ كەسوكاری شەهیدانی كوردە فەیلییەكان وتەیەكی پێشكەش كردو هەڵمەتی ئاوارەبونی سیستماتیک و بێسەروشوێنکردنی بەزۆری گەنجانی کوردی فەیلی وەبیرهێنایەوە، کە هەزارانیان لە گۆڕە بەکۆمەڵەکاندا بێسەروشوێن بون، پاش ئەوەی وەک تاقیکردنەوە لە تاقیگەکانی چەکی بایەلۆجی بە شێوەیەکی دڕندانە بەکارهێنران و جەختی لەوە کردەوە کە فەیلییەکان قوربانیان داوە و بەشدارییان کردوە لە بنیاتنانی دەوڵەتی عێراق.

سودانی جەختی لەسەر بەردەوامی پرۆسەی لێپرسینەوە و دادگایی کردن و تۆمارکردنی سکاڵا لە دژی سەرجەم ئەو کەسانە کردەوە، کە دەستیان لە ئەم تاوانانە هەبوە و بە دادگایی کردنی سەدام دەستیپێکرد، جگە لە دەستگیرکردنی گروپێک چەند مانگێک لەمەوبەر لە بەڕێوەبەرانی ئاسایشی گشتی بەدناو لە ناو عێراق کە بەشێک بون لە سوپای لایەنگرانی ڕژێمی پێشو و تاوانیان ئەنجامداوە.

سەرۆك وەزیرانی عێراق وتیشی، حکومەت قوربانیدانی گەلی عێراقی لەبیر نەکردوە، ئێمەش فەرمانمان کرد بۆ تەواوکردنی ئەو ڕێکارە یاساییانەى کە دادپەروەری بۆ قوربانییەکان دابین دەکەن بۆ گەڕانەوەی مافەکانیان و بە بەڵگەکردنی تاوانەکانیان.

ئەوەشی خستەڕو، لە ڕێگەی بونی ڕاوێژکارێک بۆ کاروباری کوردە فەیلییەکان ڕۆژی 2 ی نیسان-مان بەڕۆژی فەرمی شەهیدانی فەیلی دیاری کرد و پارچە زەوییەکمان بۆ گۆڕستانی شەهیدانی فەیلی تەرخان کرد.

هێمای بۆ ئەوەش كرد،  ڕاسپاردەمان دەرکرد بۆ دەستنیشانکردنی ڕێکخەرێک لەگەڵ وەزارەتی ناوخۆ بۆ بەدواداچون بۆ پرسەکانی دەرکردنی ڕەگەزنامە و ڕاستکردنەوەی مامەڵەکان.

هێمای بۆ ئەوەش كرد، داوامان کرد لەگەڵ دادگا پەیوەندیدارەکان هەماهەنگی بکرێت بۆ بەدواداچون بۆ دۆسیەکانی پەیوەست بە کوردە فەیلییەکان و داوامان كرد کەسوکاری شەهیدان کرد سکاڵا تۆمار بکەن لە دژی پياوەکانی ڕژێمی پێشو کە دەستیان هەبوە لە جینۆساید کردنی ئەم پێکهاتە عێراقییە.

ئەوەشی خستەڕو، ڕاسپاردەمان دەرکرد بۆ پێکهێنانی لیژنەیەک بۆ دیاریکردنی ستانداردی دابەشکردنی یەکەی نیشتەجێبون لە کۆمەڵگەی زەرباتیە بەسەر ڕۆڵەکانی پێکهاتەکە کە شایستەن.

وتیشی، پارێزگاکانی دیاله و واست-مان ڕاسپارد بۆ ئاوەدانکردنەوەی ناوچە مێژوییەکانی نیشتەجێبون بەدرێژایی سنور و تەرخانکردنی هەلی کار بۆ ڕۆڵەکانی پێکهاتەکە.

جەختیشی كردەوە، کاردەکەین بۆ لابردنی ئەو ئاستەنگانەی کە لە ڕێکار و بڕیارەکانی پەیوەست بە مافی فەیلیەکانن.