وتەبێژی پارتی سۆسیال دیموكراتی كوردستان رایگەیاند، بەشداریكردنیان لە كابینەی 10ی حكومەتی هەرێمی كوردستان ئەگەرێكی بەهێزەو دەشڵێت، دەیانەوێت وەزارەتێكی خزمەتگوزاری لە كابینەی نوێ وەربگرن.
ئاوێنە: فەرهاد تۆفیق، وتەبێژی پارتی سۆسیال دیموكراتی كوردستان، ئەمڕۆ چوارشەممە، لە لێدوانێكدا وتی، دوای ئەوەی ڕێكارەكانی پێكهێنانی كابینەی تازەی حكومەت لە پەرلەمانی كوردستان ئەنجام دران، ئینجا سەردانە فەرمییەكانی لایەنی سەرەكیی حكومەت بۆ لای لایەنە سیاسییەكان دەستپێدەكات و ئەوكاتە كاتی ئەوە دەبێت كە لایەنەكان بڵێن بەشدار یان بەشدار نابن لە حكومەت و خواست و داواكارییەكانی خۆیان دەخەنەڕو، بەڵام بۆ ئێمە بەشداریكردنمان لە كابینەی تازەی حكومەتی هەرێمی كوردستان ئەگەرێكی بەهێزە.
وتیشی، ئەوەی بۆ ئێمە گرنگە ئەوەیە كە حكومەتێكی خزمەتگوزار و لە ئاست ویست و خواستی خەڵكی كوردستاندا بێت، هاوكات بەرنامەیەكی تۆكمەی بەهێزی هەبێت بۆ ئاستی ئەو گوشارانەی لە ناوخۆ و دەرەوەی عێراق كە دەخرێنە سەر هەرێمی كوردستان، ئێمە هەمیشە ڕامانگەیاندوە ئەگەر بەشداربین یاخود نا، حكومەتی هەرێمی كوردستان بە حكومەتی خۆمان دەزانین، لەبەر ئەوەی ئێمە خوێنمان بۆی ڕشتوە.
ئاماژەی بەوەشدا، دوای ئەوەی شاندی فەرمی دێتە لامان بۆ بابەتی پێكهێنانی حكومەت، ئێمە بەرنامەی خۆمانمان هەیە و بۆ ئێمە خزمەتكردنی خەڵك گرنگە، بۆیە داوای ئێمە ئەوەیە كە وەزارەتێكی خزمەتگوزاری لە كابینەی 10ی حكومەت وەربگرین.
پارتی سۆسیال دیموكراتی كوردستان لە دوایین هەڵبژاردنی پەرلەمانی كوردستاندا توانی كورسییەكی پەرلەمان بەدەستبێنێت.