پیت هێگسێت، وەزیری بەرگری ئەمریکا بە ناردنی فڕۆکەی جەنگیی زیاتر توانای سەربازیی ئەمریکای لە ڕۆژهەڵاتی ناوەڕاست بەهێزتر کرد، ئەوەش لە کاتێکدایە کە زیاتر لە دو هەفتەیە هەڵمەتی بۆردومانی ئەمریکا لە یەمەن و پەرەسەندنی گرژییەکانی لەگەڵ ئێران له ئارادایه.
ئاوێنە: وه‌زاره‌تی به‌رگری ئه‌مریكا (پنتاگۆن) لە بەیاننامەیه‌كی کورتدا ڕایگه‌یاندوه، ده‌یان فڕۆكه‌ی جه‌نگی ڕه‌وانه‌ی ڕۆژهه‌ڵاتی ناوه‌ڕاست كردوه، به‌ڵام ئاماژەی بەوەنەکردوە کە کام فڕۆکە جێگیر دەکرێن و بە وردی بۆ کوێ دەنێردرێت.
بەپێی لێدوانی بەرپرسانی ئەمریکا کە نەیانویستوه، ناویان ئاشکرا بکرێت، لە ماوەی هەفتەی ڕابردودا یان زیاتردا شەش فڕۆکەی بۆمبهاوێژی B-2 گواستراونەتەوە بۆ بنکەیەکی سەربازی ئەمریکا و بریتانیا لە دورگەی دیێگۆ گارسیای زەریای هیندی.
شارەزایان دەڵێن، فڕۆکەکانی B-2 کە تەکنەلۆژیای پێشكه‌وتویان هەیە و ئامێری هەڵگرتنی قورسترین بۆمبی ئەمریکی و چەکی ئەتۆمییان تێدایە له ئێستادا له ڕۆژهه‌ڵاتی ناوه‌ڕاست خراونه‌ته ئه‌ركه‌وه.
شۆن پارنێل، وتەبێژی پنتاگۆن لە بەیاننامەیەکدا ڕایگەیاندوە، "ئەگەر ئێران یان بریکارەکانی هەڕەشە لە کارمەندان و بەرژەوەندییەکانی ئەمریکا بکەن لە ناوچەکە، ئەمریکا ڕێوشوێنی یەکلاکەرەوە بۆ بەرگریکردن لە گەلەکەمان دەگرێتەبەر".
فەرماندەیی ستراتژیکی سوپای ئەمریکا ڕەتیکردەوە بڵێت چەند فڕۆکەی بی دو گەیشتوەتە دیێگۆ گارسیا و ئاماژەی بەوەدا کە هیچ لێدوانێک لەسەر ئەو مەشق و ئۆپەراسیۆنانە نادات کە فڕۆکەی B-2ی تێدایە.