وەزیری ناوخۆی توركیا ریگەیاند، لە سەرەتای خۆپیشاندانەكانی توركیاوە تاوەكو دوێنێ یەكشەممە، هەزارو 133 خۆپیشاندەر دەستگیركراون. وەزیرەكە چەندین تۆمەتی داوەتە پاڵ ئەو كەسانەو وتوشیەتی، 123 پۆلیس لە خۆپیشاندانەكاندا برینداربون.
ئاوێنە: عه‌لی یه‌رلیكایا وه‌زیری ناوخۆی توركیا، لە راگەیەندراوێكدا وتی، لە بەرەبەیانی رۆژی 19ی ئەم مانگە تاوەكو دوێنێ یەكشەممە، هه‌زار و 133 خۆپیشاندەر دەستگیركراون.
خۆپیشاندانەكانی توركیا به‌هۆی ده‌ستگیركردنی ئه‌كره‌م ئیمام ئۆغڵو، سه‌رۆكی گه‌وره شاره‌وانی ئه‌سته‌نبوڵ چه‌ند رۆژێكه بەردەوامن.
وەزیری ناوخۆی توركیا ئەو كەسانەی تۆمەتباركردون بە ئەنجامدانی كاری توندوتیژی و هێرشكردنە سەر پۆلیس و چەند تۆمەتێكی دیكەشی خستونەتە پاڵ و وتویەتی، لەخۆپیشاندانەكاندا 123 پۆلیس برینداربون.
ئەوەشی خستۆتەڕو، 12 كەس لە دەستگیركراوان تۆمەتباركراون بەوەی پەیوەندییان بە "رێكخراوی تیرۆریستی" جیاجیاوە هەیە.
جەختیشی كردەوە كە رێكارە یاساییەكان بەردەوام لە دژی ئەو كەسانەی كە بەقسەی ئەو هێرشیان كردۆتە سەر پۆلیس و زیانیان بە شوێنە گشتییەكان گەیاندوەو بونەتە هەڕەشە بۆ سەر ئاسایشی هاوڵاتیان.