ئەمڕۆ یەكشەممە 9.3.2025 لە شارەكانی كەربەلا، دیالە، دیوانییە و ئەنبار پشووی فەرمییە لە قوتابخانەكان، ئەمەش بەهۆی بەردەوامیی بارانبارین، كەشناسیی عێراقیش دەڵێت، شەپۆڵەكە بەردەوام دەبێت.
ئاوێنە: راگەیاندنی پارێزگای كەربەلا بڵاویكردەوە، پارێزگار بڕیاری داوە ئەمڕۆ پشووی قوتابخانەكان بێت، چونكە بارانی بەخوڕ بەردەوامە و مەترسی لەسەر قوتابیان هەیە.
بەڕێوەبەرایەتیی پەروەردەی دیالە لای خۆیەوە بە هەمان مەبەست، دەوامی قوتابخانەكانی داخست، دوو رۆژی رابردووش بارانبارینی بەخوڕ لەوێ بەردەوام بوو.
لە پارێزگاكانی ئەنبار و دیوانییە و میسانیش بە هەمان شێوە پارێزگارەكان بڕیاریان دا قوتابخانەكان دابخرێن و ژیانی قوتابیان لەبەر لافاو و باران پارێزراو بێت.
هەروەها پەروەردەی سەڵاحەدین بڕیاری دا دەوامی قوتابخانەكانی قەزای سامەڕا رابگرێت هەر بەهۆی هەمان بارودۆخەوە.
چەند رۆژێكە شەپۆڵێكی باران و سەرما شارەكانی ناوەڕاست و باشووری عێراقی گرتووەتەوە و بارانی بەخوڕ لە چەند شوێنێك لافاوی دروست كردووە، هەروەها لە بەشی رۆژهەڵاتی سنووری ئێرانیشەوە ئاوێكی زۆر هاتووەتە ناو عێراقەوە و ئەمەش كێشەی بۆ هەندێك ناوچە دروست كردووە.
هەر لەم چوارچێوەیەدا دەستەی كەشناسیی عێراق ئەمڕۆ بڵاویكردەوە، ئەمڕۆ باران لە چەند شارێكی عێراق بەردەوام دەبێت، كە هەورەبروسكە و بای بەهێزی لەگەڵ دەبێت، ئەوەشیان خستووەتەڕوو، كە ئەم كەشە تا چوارشەممە بەردەوام دەبێت و باران لە چەند ناوچەیەكی باكووری عێراقیش دەبارێت.