پۆلیسی توركیا، ئەمڕۆ هەینی، لە وان و ئیستانبوڵ هەڵیكوتاوەتە سەر ماڵی چوار رۆژنامەنوس و دەستگیری كردون.
ئاوێنە: بەپێی میدیاكانی باكوری كوردستان، ئەمڕۆ هەینی پۆلیسی توركیا لە وان هەڵیكوتاوەتە سەر ماڵی رۆژنامەنوس رەیحان حاجی ئۆغلۆ و دەستگیریان كردوە.
هاوكات پۆلیس لە ئیستانبوڵ هەڵیكوتاوە سەر ماڵی هەریەكە لە رۆژنامەنوسان، ئەحمەد گونیش و نەجلا دەمیر و رەحیمە كار و دەستگیری كردون.
تاوەكو ئێستا هۆكاری دەستگیركردنی ئەو رۆژنامەنوسانە ئاشكرا نەكراوە.
هاوكات پۆلیس دەستی گرتوە بەسەر كەرەستە رۆژنامەوانییەكانی ئەو رۆژنامەنوسانەدا.
بەپێی میدیاكانی باكوری كوردستان، لەكاتی هەڵكوتانە سەر ماڵی رەیحان حاجی ئۆغلۆ لە وان، پۆلیس هەڕەشەیان لەو رۆژنامەنوسەو هاوڕێكانی كردوە.
ئەو ژنە رۆژنامەنوسە وەڵامی هەڕەشەكانی پۆلیسی داوەتەوەو وتویەتی، بە دەستگیركردن و ئەشكەنجەدان ناتوانن وامان لێ بكەن دەستبەرداری نوسینی راستییەكان ببین، میدیای ئازاد بێدەنگ ناكرێت.